தேவாரத்தில் கஞ்சா விற்பனை செய்த வழக்கில் சிக்கிய பெண் உள்ளிட்ட 4 போ் குண்டா் தடுப்புச் சட்டத்தின் கீழ் செவ்வாய்க்கிழமை கைது செய்யப்பட்டு சிறையில் அடைக்கப்பட்டனா்.
தேவாரம் பகுதியில் கஞ்சா விற்பனை செய்ததாக தேவாரம், செளடம்மன் கோவில் தெருவைச் சோ்ந்த பெரியபொன்னையா மகன் மூா்த்தி (55), அரசு மேல்நிலைப் பள்ளி தெருவைச் சோ்ந்த நடராஜ் மகன் முருகன் (50), பேசியம்மன் கோவில் தெருவைச் சோ்ந்த இன்பராஜ் மகன் தினேஷ் (44), மூணாண்டிபட்டியைச் சோ்ந்த துரைப்பாண்டி மனைவி முத்துப்பிள்ளை (60) ஆகியோரை சில நாள்களுக்கு முன்பு தேவாரம் காவல் நிலைய போலீஸாா் கைது செய்தனா்.
மூா்த்தி உள்ளிட்ட 4 போ் மீதும் தேவாரம், கம்பம், தேனி, உசிலம்பட்டி, கரூா், நாமக்கல், சேலம் காவல் நிலையங்களில் கஞ்சா கடத்தல், கஞ்சா விற்பனை வழக்குகள் பதிவு செய்யப்பட்டிருப்பதால், அவா்களை குண்டா் தடுப்புச் சட்டத்தின் கீழ் கைது செய்து சிறையில் அடைக்க மாவட்ட ஆட்சியா் ஆா்.வி.ஷஜீவனாவுக்கு மாவட்ட காவல் கண்காணிப்பாளா் சிவபிரசாத் பரிந்துரை செய்தாா். இதன்படி, மூா்த்தி உள்ளிட்ட 4 பேரும் மாவட்ட ஆட்சியா் உத்தரவின் பேரில் குண்டா் தடுப்புச் சட்டத்தின் கீழ் மதுரை மத்திய சிறையில் அடைக்கப்பட்டனா்.
