ஸ்ரீவில்லிபுத்தூா் அருகே கட்டி முடிக்கப்பட்ட அரசுப் பள்ளி வகுப்பறை கட்டடத்தை திறக்க வேண்டும் என கோரிக்கை எழுந்துள்ளது.
ஸ்ரீவில்லிபுத்தூா் ஊராட்சி ஒன்றியம், அத்திகுளம், செங்குளம் ஊராட்சிக்குள்பட்ட சின்ன அத்திக்குளம் ஊராட்சி ஒன்றிய நடுநிலைப் பள்ளியில் 100-க்கும் மேற்பட்ட மாணவா்கள் பயின்று வருகின்றனா். இந்தப் பள்ளி 1 முதல் 5-ஆம் வகுப்பு வரை ஒரு கட்டடத்திலும், 6 முதல் 8-ஆம் வகுப்பு வரை மற்றொரு கட்டடத்திலும் இயங்கி வந்தது.
இதில் ஒரு கட்டடம் சேதமடைந்ததால், கடந்த 2021-ஆம் ஆண்டு அது இடிக்கப்பட்டது. இதனால் மாணவா்கள் ஒரே கட்டடத்தில் இட நெருக்கடியில் கல்வி பயின்று வருகின்றனா். இதனிடையே, இரு ஆண்டுகள் கழித்து கட்டுமானப் பணி தொடங்கி நிறைவடைந்தது. வகுப்பறை கட்டடம் கட்டப்பட்டு 3 மாதங்களுக்கு மேல் ஆகியும் திறக்கப்படாததால் மாணவா்கள் கடும் சிரமத்துக்கு ஆளாகி வருகின்றனா்.
எனவே, இந்தக் கட்டடத்தை திறக்க மாவட்ட நிா்வாகம் நடவடிக்கை எடுக்க வேண்டும் என பெற்றோா்கள் கோரிக்கை விடுத்தனா்.
