கரூரில் டாஸ்மாக் கடையில் கள்ள நோட்டை மாற்ற முயன்ற ஹோட்டல் தொழிலாளி கைது

கரூரில் டாஸ்மாக் கடையில் செவ்வாய்க்கிழமை கள்ள நோட்டை மாற்ற முயன்ற ஹோட்டல் தொழிலாளியை போலீஸாா் கைது செய்தனா்.

கரூா் தாந்தோன்றிமலையைச் சோ்ந்தவா் காண்டீபன் (55). இவா் திருச்சி வயலூரில் உள்ள ஹோட்டல் ஒன்றில் தொழிலாளியாக வேலை செய்து வருகிறாா். விடுமுறையில் தாந்தோன்றிமலைக்கு வந்த அவா், செவ்வாய்க்கிழமை இரவு மது வாங்க காளியப்பனூரில் உள்ள டாஸ்மாக் கடைக்குச் சென்றுள்ளாா். அங்கு, 500 ரூபாய் பணத்தாளை கொடுத்து மதுவாங்கியுள்ளாா். இந்த ரூபாய் நோட்டை பாா்த்து சந்தேகமடைந்த டாஸ்மாக் ஊழியா், அதுகுறித்து விசாரித்ததில் அது கள்ள நோட்டு என்பது கண்டறியப்பட்டது.

இதையடுத்து அங்கிருந்தவா்கள் காண்டீபனை பிடித்து தாந்தோன்றிமலை போலீஸில் ஒப்படைத்தனா். அவரை போலீஸாா் கைது செய்து விசாரணை நடத்தியதில், தனக்கு ஹோட்டல் உரிமையாளா் ஊதியமாக கொடுத்த பணம்தான் அது என கூறியுள்ளாா். இதையடுத்து, அந்த ஹோட்டல் உரிமையாளரிடம் விசாரணை நடத்த முடிவு செய்திருப்பதாக போலீஸாா் தெரிவித்தனா்.