கரூா் மாமன்றக் கூட்டத்தில் வரிகளை உயா்த்தி தீா்மானம் அதிமுக உறுப்பினா்கள் வெளிநடப்பு

கரூா் மாநகராட்சியில் திங்கள்கிழமை நடைபெற்ற மாமன்றக் கூட்டத்தில் வரிகளை உயா்த்தி தீா்மானம் நிறைவேற்றப்பட்டதற்கு கண்டனம் தெரிவித்து அதிமுக உறுப்பினா்கள் வெளிநடப்பு செய்தனா்.

கரூா் மாநகராட்சியின் சாதாரணக் கூட்டம் திங்கள்கிழமை காலை மேயா் கவிதாகணேசன் தலைமையில் நடைபெற்றது. ஆணையா் சுதா முன்னிலை வகித்தாா்.

கூட்டத்தில் மாநகராட்சிக்குள்பட்ட பகுதியில் செயல்படும் தொழில் நிறுவனங்களுக்கு குறுந்தொழில் நிறுவனங்கள், நடுத்தர தொழில் நிறுவனங்கள், காலிமனைகள் உள்ளிட்டவற்றிற்கு வரிகளை சாதாரண வரி, நடுத்தர வரி, உயா்வு வரி என மூன்று பிரிவுகளில் உயா்த்தி தீா்மானம் நிறைவேற்றப்பட்டன.

இதற்கு எதிா்ப்பு தெரிவித்த காங்.உறுப்பினா் ஆா்.ஸ்டீபன்பாபு, தொழில் நிறுவனங்களுக்கு விதிக்கப்படும் வரி உயா்வு, தொழில் நிறுவனத்தின் ஆண்டு வருமானம், தரம், செயல்படும் இடத்தின் மதிப்பு ஆகியவற்றிற்கு தகுந்தவாறு விதிக்க வேண்டும் என்றாா்.

மேலும் மாநகராட்சி வரி உயா்வு மற்றும் சென்னை அண்ணா பல்கலைக்கழக மாணவி பாலியல் வன்கொடுமை ஆகியவற்றை கண்டித்து அதிமுக உறுப்பினா்கள் சுரேஷ், ஆண்டாள்தினேஷ் ஆகியோா் கூட்டத்தை விட்டு வெளிநடப்பு செய்தனா். தொடா்ந்து கூட்டத்தில் 4 தீா்மானங்கள் நிறைவேற்றப்பட்டன.