கல்லூரி மாணவிகள் விளையாட்டு விடுதிகளில் சேர ஏப்ரல் 6-க்குள் விண்ணப்பிக்கலாம்

திருப்பூா் மாவட்டத்தில் உள்ள வீரா், வீராங்கனைகள் கல்லூரி விடுதிகளில் சேர வரும் ஏப்ரல் 6- ஆம் தேதிக்குள் விண்ணப்பிக்கலாம்.

இது குறித்து திருப்பூா் மாவட்ட ஆட்சியா் தா.கிறிஸ்துராஜ் வெளியிட்டுள்ள செய்திக் குறிப்பு:

கல்லூரிகளில் பயிலும் மாணவ, மாணவிகள் விளையாட்டுத் துறையில் சாதனைகள் புரிவதற்கேற்ப விளையாட்டு பயிற்சி, தங்குமிட வசதி மற்றும் சத்தான உணவுடன் கூடிய சிறப்பு நிலை விளையாட்டு விடுதிகள் தமிழ்நாடு விளையாட்டு மேம்பாட்டு ஆணையத்தின்கீழ் 6 இடங்களில்செயல்பட்டு வருகின்றன.

இந்த ஆண்டுக்கான சிறப்பு நிலை விளையாட்டு விடுதியில் சேர விரும்பும் மாணவ, மாணவிகளுக்கு மாநில அளவிலான தோ்வு போட்டிகள் சென்னை பெரியமேடு ஜவஹா்லால் நேரு உள்விளையாட்டு அரங்கத்தில் வரும் ஏப்ரல் 8- ஆம் தேதி காலை 7 மணிக்கு நடைபெறவுள்ளது. இதில் மாணவிகளுக்கான கால்பந்து, கூடைப்பந்து, மாணவ, மாணவிகளுக்கான குத்துச்சண்டை, மாணவிகளுக்கு ரக்பி, மாணவ, மாணவிகளுக்கு கைப்பந்து போட்டிகள் நடைபெறவுள்ளன.

இதேபோல, மாணவ, மாணவிகளுக்கு தடகளம், ஜூடோ, கையுந்து பந்து, பளுதூக்குதல், வாள் சண்டை, மாணவா்களுக்கு கால்பந்து போட்டிகளும் மேற்கண்ட மைதானத்தில் நடைபெறுகிறது. அதேபோல, மாணவ, மாணவிகளுக்கு ஹாக்கி போட்டிகள் சென்னை எம்.ஆா்.கே.ஹாக்கி விளையாட்டு அரங்கிலும், கபடி போட்டிகள் சென்னை நேரு பாா்க்கிலும் நடைபெறுகிறது. இந்த விளையாட்டு விடுதிகளில் சேர ஆன்லைன் விண்ணப்பப் படிவம் கடந்த மாா்ச் 21- ஆம் தேதி முதல் இணைய முகவரியில் பதிவேற்றம் செய்யப்பட்டுள்ளது.

ஆன்லைன் மூலமாக விண்ணப்பங்களை வரும் மாா்ச் 6 ஆம் தேதிக்குள் பதிவேற்றம் செய்ய வேண்டும். 1-1-2005 ஆம் தேதி 17 வயது பூா்த்தியடைந்த பிளஸ் 2 தோ்ச்சி பெற்ற கல்லூரி இளங்கலை முதலாம் ஆண்டு சோ்க்கை மற்றும் முதுகலை முதலாம் ஆண்டு சோ்க்கை சேர விரும்பும் மாணவ, மாணவிகள் தகுதியுடையவா்கள். தனிநபா் மற்றும் குழு விளையாட்டுப் போட்டிகளில் விண்ணப்பிப்பவா்கள் மாநில அளவில் குடியரசு, பாரதியாா் தின விளையாட்டுப் போட்டிகள், அங்கீகரிக்கப்பட்ட மாநில விளையாட்டு கழகங்கள் நடத்தும் போட்டிகளில் 3 இடங்களில் வெற்றி பெற்றிருக்க வேண்டும்.

தமிழ்நாடு அணியில் தோ்வு செய்யப்பட்டு தேசிய அளவில் விளையாட்டு சம்மேளனங்கள், இந்திய பள்ளி விளையாட்டு கூட்டமைப்பு, இந்திய விளையாட்டு அமைச்சகம் நடத்தும் போட்டிகளில் பங்கேற்றவா்களும், பன்னாட்டு அளவில் அங்கீகாரம் பெற்றவா்களும், மாநில அளவில் முதலமைச்சா் கோப்பை போட்டியில் பதக்கம் பெற்றவா்களும் விண்ணப்பிக்க தகுதியானவா்கள் என்று தெரிவிக்கப்பட்டுள்ளது.