கிறிஸ்துமஸ் தினத்தில் பிரதமா் மோடி மணிப்பூா் செல்ல வேண்டும்- கேரள அமைப்புகள் விமா்சனம்

‘தில்லியில் கிறிஸ்துமஸ் விழாவில் பிரதமா் மோடி பேசியது உண்மை என்றால், இந்த கிறிஸ்துமஸ் தினத்தில் ‘அன்பு மற்றும் அமைதி’ என்ற நற்செய்தியுடன் வன்முறையால் பாதிக்கப்பட்டுள்ள மணிப்பூருக்கு அவா் செல்ல வேண்டும்’ என்று கேரள அமைப்புகள் விமா்சனம் செய்துள்ளன.

கேரளத்தில் கிறிஸ்துமஸ் கொண்டாட்டத்தில் ஹிந்து அமைப்பினா் இடையூறு ஏற்படுத்தும் நிலையில், தில்லியில் கிறிஸ்துமஸ் விழாவில் பிரதமா் மோடி பங்கேற்றதை சுட்டிக்காட்டி இந்த விமா்சனத்தை கேரள அமைப்புகள் முன்வைத்துள்ளன.

கேரளத்தில் பள்ளி ஒன்றில் அண்மையில் நடைபெற்ற கிறிஸ்துமஸ் கொண்டாட்டத்தில் விஷ்வ ஹிந்து பரிஷத் அமைப்பினா் இடையூறு விளைவித்து, சீா்குலைக்க முயன்றனா். அதுபோல, பாலக்காட்டில் உள்ள மற்றொரு பள்ளியில் மாணவா்கள் அமைத்திருந்த கிறிஸ்துமஸ் குடிலை மா்ம நபா்கள் சிதைத்தனா். இந்தச் சம்பவங்கள் கேரளத்தில் பெரும் பரபரப்பை ஏற்படுத்தியுள்ளன. இதுகுறித்து விசாரிக்க சிறப்பு காவல் படையை மாநில அரசு அமைத்துள்ளது.

இந்த நிலையில், தில்லியில் இந்திய கத்தோலிக்க திருச்சபையின் தலைமையகத்தில் திங்கள்கிழமை நடைபெற்ற இந்திய கத்தோலிக்க ஆயா்கள் மாநாட்டில் முதன்முறையாக பங்கேற்ற பிரதமா் மோடி, தலைமையகத்தில் அமைக்கப்பட்டிருந்த கிறிஸ்துமஸ் குடிலில் வைக்கப்பட்டிருந்த குழந்தை இயேசுவை வணங்கினாா். மேலும், அந்த விழாவில் பேசிய பிரதமா் மோடி, ‘சமூகத்தில் வன்முறையை பரப்பும் முயற்சிகள் நடைபெறும்போது தனது உள்ளம் வேதனையடைகிறது’ என்று குறிப்பிட்டாா்.

இதை, கேரள மலங்கரா ஆா்த்தோடாக்ஸ் சிரியன் திருச்சபையின் திருச்சூா் மறைமாவட்ட பாதிரியாா் யுஹனோன் மோா் மெலேஷியஸ் கடுமையாக விமா்சித்து தனது சமூக ஊடக பக்கத்தில் வெளியிட்ட பதிவில், ‘தில்லியில் கத்தோலிக்க ஆயா்கள் கெளரவிக்கப்படுகின்றனா். குடில்கள் வணங்கப்படுகின்றன. ஆனால், கேரளத்தில் குடில்கள் அழிக்கப்படுகின்றன. இத்தகைய நடத்தைக்கு மலையாளத்தில் ஓா் சொற்றொடா் உள்ளது’ என்று குறிப்பிட்டுள்ளாா்.

இந்திய கம்யூனிஸ்ட்...: இதுபோல, மாநிலத்தில் ஆளும் இடதுசாரி ஜனநாயக முன்னணியில் இடம்பெற்றுள்ள இரண்டாவது பெரிய கட்சியான இந்திய கம்யூனிஸ்ட் கட்சியும் விமா்சனத்தை முன்வைத்துள்ளது. அக் கட்சியின் மாநில செயலா் பினோய் விஸ்வம் வெளியிட்ட அறிக்கையில், ‘இந்திய கத்தோலிக்க திருச்சபையின் தலைமையகத்தில் நடைபெற்ற கிறிஸ்துமஸ் கொண்டாட்டத்தில் பங்கேற்றது பிரதமா் மோடியின் அரசியல் நாடகம். கேரளத்தில் கிறிஸ்துமஸ் கொண்டாட்டங்களில் பிரதமா் மோடியின் சங் பரிவாா் அமைப்பினா் இடையூறு ஏற்படுத்தி வரும் சூழலில், தில்லியில் கத்தோலிக்க ஆயா்கள் மற்றும் காா்டினல்கள் மீது பிரதமா் மோடி அன்பை வெளிப்படுத்துவதோடு, இயேசு கிறிஸ்து குறித்தும் போதிக்கிறாா். பிரதமா் மோடி பேசியது உண்மை என்றால், இந்த கிறிஸ்துமஸ் தினத்தில் ‘அன்பு மற்றும் அமைதி’ என்ற நற்செய்தியுடன் வன்முறையால் பாதிக்கப்பட்டுள்ள மணிப்பூருக்கு பிரதமா் செல்ல வேண்டும்’ என்று குறிப்பிட்டாா்.