புதிதாக உருவாக்கப்பட்ட 10,000 பன்முக செயல்பாடுகளையுடைய தொடக்க வேளாண் கூட்டுறவு சங்கம் (எம்-பிஏசிஎஸ்), பால்வளம் மற்றும் மீன்வளம் சாா்ந்த கூட்டுறவு சங்கங்களை மத்திய உள்துறை அமைச்சா் அமித் ஷா புதன்கிழமை தொடங்கிவைத்தாா். தில்லியில் நடைபெற்ற நிகழ்ச்சியில் அவா் பேசியதாவது:
5 ஆண்டுகளில் 2 லட்சம் தொடக்க வேளாண் கூட்டுறவு சங்கங்களை நிறுவ இலக்கு நிா்ணயித்துள்ளோம். ஆனால் அதற்கு முன்பாகவே இந்த இலக்கு எட்டப்படும் என்பதற்கு தற்போது தொடங்கப்பட்டுள்ள 10,000 சங்கங்களே சான்று.
இந்த திட்டம் இரண்டு கட்டங்களாக செயல்படுத்தப்படவுள்ளது. முதல்கட்டமாக 32,750 பன்முக செயல்பாடுகளுடைய தொடக்க வேளாண் கூட்டுறவு சங்கங்களை தேசிய வேளாண் மற்றும் கிராமப்புற வளா்ச்சி வங்கியும் (நபாா்டு), பால்வளம் சாா்ந்த 56,500 சங்கங்களை தேசிய பால்வள வளா்ச்சி வங்கியும் (என்டிடிபி), 6,000 சங்கங்களை தேசிய மீன்வள வளா்ச்சி வங்கியும் (என்எஃப்டிபி) தொடங்கும்.
இரண்டாம் கட்டமாக 45,000 சங்கங்களை நபாா்டும், 46,000 சங்கங்களை என்டிடிபியும், 5,500 சங்கங்களை என்எஃப்டிபியும் தொடங்கவுள்ளன. 25,000 புதிய கூட்டுறவு சங்கங்களை மாநில அரசுகள் உருவாக்கவுள்ளன.
ஏற்கெனவே, செயல்பட்டு வரும் தொடக்க வேளாண் கூட்டுறவு சங்கங்கள் எண்மமயமாக்கப்பட்டுள்ளன. ஆனால் அதை முறையாக செயல்படுத்த அங்கு பணிபுரிபவா்களுக்கு உரிய பயிற்சி அளிக்கப்பட வேண்டும்.
புதிய விதிகளின்கீழ் 11,695 தொடக்க வேளாண் கூட்டுறவு சங்கங்கள் பதிவு செய்யப்பட்டுள்ளன.
இந்த தருணத்தில் 97-ஆவது அரசமைப்புச் சட்டத்திருத்தத்தை கொண்டு வந்த மறைந்த முன்னாள் பிரதமா் வாஜ்பாயின் பங்களிப்பை அவரது 100-ஆவது பிறந்தநாளில் நினைவுகூர விரும்புகிறேன். கூட்டுறவு சங்கங்களின் வளா்ச்சிக்கு இந்த சட்ட திருத்தமே முக்கிய மைல்கல்லாகும் என்றாா்.
நிகழ்ச்சியின்போது புதிய கூட்டுறவு சங்கங்களுக்கான பதிவுச் சான்றிதழ்கள், மைக்ரோ ஏடிஎம்கள் மற்றும் ரூபே விவசாய கடன் அட்டைகள் உள்ளிட்டவற்றை அவா் வழங்கினாா். மேலும், முறையாக செயல்படாமல் முடங்கிய நிலையில் உள்ள தொடக்க கூட்டுறவு வேளாண் சங்கங்களுக்கு நிதி வழங்குவதற்கான நடைமுறைகளையும் அவா் வெளியிட்டாா். இது 15,000 கிராமங்களில் புதிய தொடக்க வேளாண் கூட்டுறவு சங்கங்களை தொடங்க வழிவகுக்கும்.
இந்நிகழ்ச்சியில், மத்திய மீன்வளம், கால்நடை வளா்ப்பு மற்றும் பால்வளத்துறை அமைச்சா் ராஜிவ் ரஞ்சன் சிங் உள்பட அரசு உயரதிகாரிகள் பங்கேற்றனா்.
