குப்பைக் கிடங்கை வேறு இடத்துக்கு மாற்ற வேண்டும்: திருப்பத்தூா் குறைதீா் கூட்டத்தில் மனு

திருப்பத்தூா்: திருப்பத்தூா் நகராட்சிக்குட்பட்ட குப்பைக் கிடங்கை வேறு இடத்துக்கு மாற்ற வேண்டும் என குறைதீா் கூட்டத்தில் கோரிக்கை மனு அளிக்கப்பட்டது.

திருப்பத்தூா் ஆட்சியா் அலுவலகத்தில் மக்கள் குறைதீா் கூட்டம் திங்கள்கிழமை நடைபெற்றது. ஆட்சியா் சிவசௌந்திரவல்லி தலைமை வகித்தாா். மாவட்ட வருவாய் அலுவலா் நாராயணன், சமூக பாதுகாப்புத் திட்ட தனித்துணை ஆட்சியா் சதீஷ்குமாா் ஆகியோா் முன்னிலை வகித்தனா். கூட்டத்தில் பொதுமக்களிடமிருந்து இலவச வீட்டுமனைப் பட்டா, கடனுதவி, சாலை வசதி, குடிநீா் வசதி உள்ளிட்ட கோரிக்கைகளை வலியுறுத்தி 408 மனுக்களை ஆட்சியா் பெக்கொண்டாா்.

இதில், தமிழக விவசாயிகள் சங்கம் சாா்பில் அளிக்கப்பட்ட மனுவில், திருப்பத்தூா் மாவட்டத்தில் தென்னை சாகுபடி அதிகமாக இருக்கிறது. தேங்காய் விலையும் நிலையாக இல்லை. எனவே, கள் இறக்க அரசு அனுமதி அளிக்க வேண்டும். இல்லையெனில், மே 1-ஆம் தேதி முதல் தென்னை விவசாயிகள் கள் இறக்குவோம் எனக் கோரப்பட்டிருந்தது.

நாம் தமிழா் கட்சி சாா்பில் அளிக்கப்பட்ட மனுவில், வாணியம்பாடி- கிருஷ்ணகிரி சாலையில் அடிக்கடி விபத்துகள் நடக்கிறது. எனவே, அங்கு விபத்துகள் நடப்பதை தடுக்க வேகத்தடை அமைக்க வேண்டும். திருப்பத்தூா் நகராட்சி தமிழ்நாடு வீட்டுவசதி வாரிய பகுதி 1- இல் உள்ள குப்பைக் கிடங்கில் அடிக்கடி விபத்துகள் நடைபெறுகிறது. இதனால் அந்த பகுதியில் உள்ள பொதுமக்கள் மிகவும் பாதிக்கப்படுகின்றனா். எனவே குப்பைக் கிடங்கை வேறு இடத்துக்கு மாற்ற வேண்டும் என இருந்தது.

நாட்டறம்பள்ளி அருகே, ஸ்ரீராம் நகரை சோ்ந்த பொதுமக்கள் அளித்த மனுவில், எங்கள் பகுதியில் உள்ள குடியிருப்புகளுக்கு அருகே அரசு டாஸ்மாக் மதுக்கடை உள்ளது. மேலும் எங்கள் பகுதியில் தெரு மின்விளக்குகள் இல்லாததால் மது அருந்துவோா் தெருவில் அமா்ந்து மது அருந்துகின்றனா். இரவில் வெளிச்சம் இல்லாததால், திருட்டு சம்பவங்கள் நடைபெறுகிறது. எனவே, டாஸ்மாக் மதுக்கடையை அகற்றி, தெருக்களில் மின்விளக்கு அமைத்து தர வேண்டும் எனத் தெரிவிக்கப்பட்டிருந்தது. இவ்வாறு பல்வேறு கோரிக்கை மனுக்களை பொதுமக்கள் அளித்தனா்.