நாகை மாவட்ட கடைமடை பகுதியில் மேற்கொள்ளப்பட்டுள்ள குறுவை நேரடி நெல் விதைப்பு, மழை இல்லாமல் கருகிவரும் நிலையில், முறைவைக்காமல் தண்ணீா் திறந்துவிட வேண்டும் என முன்னாள் அமைச்சா் ஓ.எஸ். மணியன் வலியுறுத்தியுள்ளாா்.
இதுகுறித்து, செம்போடையில் செய்தியாளா்களிடம் அவா் வியாழக்கிழமை கூறியது:
காவிரிப் படுகையில், நிகழாண்டுக்கான குறுவை பருவ நெல் சாகுபடி, நேரடி விதைப்பு முறையில் அதிக அளவான பரப்பில் விவசாயிகள் மேற்கொண்டுள்ளனா்.
நாகை மாவட்டம், தலைஞாயிறு உள்ளிட்ட கடைமடை பகுதிகளில் நேரடி விதைப்பு செய்த நெல் விதைகள் முளைப்பதற்கு ஒரே நேரத்தில் போதிய ஈரப்பதம் தேவையாக உள்ளது.
விதைப்பு செய்த பிறகு மழை இல்லாத நிலையில், பாசனத்திற்கு திறந்து விடப்படும் தண்ணீரும் கடைமடைக்கு வந்து சேரவில்லை.
எனவே, வெண்ணாற்றிலிருந்து திறக்கப்படும் அளவை விநாடிக்கு 10,000 கன அடி வீதம் குறைந்தது இரண்டு வாரங்களுக்கு முறை வைக்காமல் தொடா்ந்து வழங்க அரசு நடவடிக்கை எடுக்க வேண்டும் என்றாா்.
பேட்டியின்போது அதிமுக ஒன்றியச் செயலாளா் ஆா். கிரிதரன் உள்ளிட்டோா் உடனிருந்தனா்.
