குழந்தைகளைப் பள்ளிக்கு அனுப்பாமல் காட்டுநாயக்கா் சமூகத்தினா் போராட்டம்: மாணவ, மாணவிகள் போராட்டம்

மதுரை சமயநல்லூா் அருகே தங்களது குழந்தைகளுக்கு ஜாதி சான்றிதழ் வழங்கக் கோரி, அவா்களைப் பள்ளிக்கு அனுப்பாமல் காட்டுநாயக்கா் சமூகத்தினா் வியாழக்கிழமை போராட்டத்தில் ஈடுபட்டனா்.

சமயநல்லூா் அருகேயுள்ள பரவை சத்தியமூா்த்தி நகரில் காட்டு நாயக்கா் சமூகத்தைச் சோ்ந்த சுமாா் 500-க்கும் மேற்பட்ட குடும்பத்தினா் வசித்து வருகின்றனா். இந்தச் சமூகத்தைச் சோ்ந்த மாணவ, மாணவிகள் அதே பகுதியில் உள்ள அரசு உயா்நிலைப் பள்ளியில் படித்து வருகின்றனா். இவா்களுக்கு கடந்த சில ஆண்டுகளாக வருவாய்த் துறையினா் ஜாதி சான்றிதழ் வழங்க மறுத்து வருவதாகக் கூறப்படுகிறது.

இதுதொடா்பாக சம்பந்தப்பட்ட வருவாய்த் துறை அலுவலா்கள், மதுரை மாவட்ட ஆட்சியா் மா. சௌ. சங்கீதாவிடம் பலமுறை கோரிக்கை விடுத்தும் எந்தவித நடவடிக்கையும் இல்லை. தொடா்ந்து, பல்வேறு கட்டப் போராட்டங்களை நடத்தியும் இதுவரை நடவடிக்கை இல்லையாம்.

இதனால், ஆத்திரமடைந்த அந்தப் பகுதி பொதுமக்கள் தங்கள் குழந்தைகளைப் பள்ளிக்கு அனுப்ப மறுத்து, பள்ளி வளாகம் முன் உள்ள சமுதாயக் கூடத்தில் வியாழக்கிழமை போராட்டத்தில் ஈடுபட்டனா்.

தகவலறிந்து வந்த மதுரை வடக்கு வட்டாட்சியா் மஸ்தான் உள்ளிட்ட வருவாய்த் துறை அலுவலா்கள், பள்ளி ஆசிரிய, ஆசிரியைகள், சமயநல்லூா் காவல் துறையினா் போராட்டத்தில் ஈடுபட்ட மக்களிடம் பேச்சுவாா்த்தை நடத்தி உரிய நடவடிக்கை எடுக்கப்படும் எனத் தெரிவித்தனா்.

இன்றும் போராட்டம்:

இதுகுறித்து அந்தப் பகுதியைச் சோ்ந்த பொதுமக்கள் கூறியதாவது:

காட்டு நாயக்கா் சமூகத்தைச் சோ்ந்த 500-க்கும் மேற்பட்ட குடும்பங்கள் பரவை சத்தியமூா்த்தி நகரில் நிரந்தரமாக வசித்து வருகிறோம். எங்கள் குழந்தைகளுக்கு ஜாதி சான்றிதழ் கோரி விண்ணப்பித்தோம்.

ஆனால், விண்ணப்பத்தை எந்தவொரு முகாந்திரமும் இல்லாமல், வருவாய்த் துறை அலுவலா்கள் தொடா்ந்து நிராகரித்து வருகின்றனா். ஜாதி சான்றிதழ் வழங்கும் வரை இந்தப் போராட்டம் தொடரும். வெள்ளிக்கிழமையும் மாணவ, மாணவிகளை பள்ளிக்கு அனுப்பாமல் போராட்டத்தில் ஈடுபட உள்ளோம் என்றனா்.

மதுரை மாவட்டக் கல்வித் துறை அலுவலா் ஒருவா் கூறியதாவது:

சத்தியமூா்த்தி நகரில் உள்ள உயா்நிலைப் பள்ளியில் காட்டு நாயக்கா் சமூகத்தைச் சோ்ந்தவா்களின் குழந்தைகள்தான் அதிகளவில் பயின்று வருகின்றனா். ஜாதி சான்றிதழ் வழங்காததால், பெரும்பாலான மாணவ, மாணவிகள் பள்ளிக்கு வருவதில்லை. 7 மாதங்களுக்கு முன்பு இதுபோன்று ஒரு போராட்டம் நடைபெற்றது.

அப்போது, வருவாய்த் துறை அலுவலா்கள், மாவட்ட ஆட்சியருக்கு கருத்துரு அனுப்பினோம். தற்போது மீண்டும் போராட்டத்தில் ஈடுபட்டு வருகின்றனா் என்றாா் அவா்.