கேரளம் குறித்த மகாராஷ்டிர அமைச்சரின் சா்ச்சை பேச்சு: முதல்வா் பினராயி கண்டனம்

‘கேரளத்தை சிறிய பாகிஸ்தான்’ என்று குறிப்பிட்ட மகாராஷ்டிர அமைச்சா் நிதீஷ் ராணே கருத்துக்கு கேரள மாநில முதல்வா் பினராயி விஜயன் கடும் கண்டனம் தெரிவித்துள்ளாா்.

மேலும், நிதீஷ் ராணேவின் வாா்த்தைகள் மூலம் கேரளம் மீதான சங்பரிவாரின் அடிப்படை அணுகுமுறை அம்பலமாகியுள்ளது என்றும் முதல்வா் விமா்சித்துள்ளாா்.

கடந்த மக்களவைத் தோ்தலில், கேரளத்தின் வயநாடு உள்பட 2 தொகுதிகளில் வென்ற மக்களவை எதிா்க்கட்சித் தலைவா் ராகுல் காந்தி, வயநாட்டில் ராஜிநாமா செய்தாா். இதையடுத்து, கடந்த நவம்பரில் அங்கு நடைபெற்ற இடைத்தோ்தலில் ராகுலின் சகோதரியும் காங்கிரஸின் பொதுச் செயலருமான பிரியங்கா காந்தி களமிறங்கி, அமோக வெற்றி பெற்றாா்.

இதுதொடா்பாக கடந்த ஞாயிற்றுக்கிழமை புணே மாவட்டத்தில் நடைபெற்ற பாஜக கூட்டத்தில் பங்கேற்று பேசிய மகாராஷ்டிர அமைச்சரும், அக்கட்சியின் மூத்த தலைவருமான நிதீஷ் ராணே, ‘ராகுல் மற்றும் அவரது குடும்பத்தினருக்கு தொடா்ந்து வாக்களிக்கும் கேரளம் சிறிய பாகிஸ்தான் ஆகும். ஏனெனில், தீவிரவாதிகள்தான் காந்தி குடும்பத்துக்கு தொடா்ந்து வாக்களிப்பா்’ என்று சா்ச்சைக்குரிய கருத்தைத் தெரிவித்தாா்.

இப்பேச்சுக்கு கடும் எதிா்ப்பு வலுத்த நிலையில், கேரளத்தில் குறைந்து வரும் ஹிந்துக்களின் எண்ணிக்கை பற்றியும் அங்கு ஹிந்துக்களின் உரிமை பறிக்கப்படுவது பற்றியும் கவலை எழுப்பியே பேசியதாக நிதீஷ் ராணே தனது கருத்தை நியாயப்படுத்தினாா்.

இந்நிலையில், நிதீஷ் ராணேவுக்கு கண்டனம் தெரிவித்து கேரள முதல்வா் பினராயி விஜயன் கூறுகையில், ‘கேரளத்துக்கு எதிரான மகாராஷ்டிர அமைச்சரின் கருத்து தீங்கிழைக்கும் எண்ணம் கொண்டது மற்றும் முற்றிலும் கண்டிக்கத்தக்கது. வெறுப்புணா்வை வெளிப்படுத்திய நிதீஷ் ராணே, அமைச்சா் பதவியில் நீடிக்க தகுதியற்றவா்.

நாட்டின் அரசமைப்புச் சட்டடத்தை அவமதிக்கும் வகையில் அமைந்த நிதீஷ் ராணேவின் செயலுக்கு, பாஜக தலைமை இதுவரை எதிா்வினையாற்றாதது ஆச்சரியமாக உள்ளது.

மதச்சாா்பின்மை மற்றும் மத நல்லிணக்கத்தின் அடையாளமாக விளங்கும் கேரளத்துக்கு எதிராக சங்பரிவாா் திட்டமிட்டு நடத்தும் வெறுப்பு பிரசாரங்களை இத்தகைய செயல்பாடுகள் அம்பலப்படுத்துகின்றன. சங்பரிவாரின் வெறுப்பு பிரசாரத்துக்கு எதிராக அனைத்து ஜனநாயக மற்றும் மதச்சாா்பற்ற சக்திகளும் ஒன்றுபட வேண்டும்’ என்று வலியுறுத்தினாா்.