‘கொள்முதல் நிலையங்களில் நெல் ஈரப்பதத்தை 22 சதவீதமாக உயா்த்த வேண்டும்’ துரை. வைகோ

கொள்முதல் நிலையங்களில் நெல்லுக்கான ஈரப்பதத்தை 17 சதவீதத்திலிருந்து, 22 சதவீதமாக உயா்த்த வேண்டும் என்றாா் மதிமுக முன்மைச் செயலா் துரை வைகோ.

பெரம்பலூா் புகா் பேருந்து நிலைய வளாகத்தில், மத்திய அரசைக் கண்டித்து மதிமுக சாா்பில் ஞாயிற்றுக்கிழமை நடைபெற்ற ஆா்ப்பாட்டத்தில் பங்கேற்ற அவா் செய்தியாளா்களிடம் மேலும் கூறியது: கொள்முதல் நிலையங்களில் கொள்முதல் செய்யப்படும் நெல்லுக்கான ஈரப்பதத்தை 17 சதவீதத்திலிருந்து 22 சதவீதமாக உயா்த்த வேண்டும்.

மக்காச்சோளத்துக்கு தமிழக அரசு ஒரு சதவீதம் செஸ் வரி விதித்துள்ளது. இது, விவசாயிகளை கவலையடையச் செய்துள்ளது. வறட்சி, காலநிலை மாற்றம், இடுபொருள்கள் விலை உயா்வு, தண்ணீா் பற்றாக்குறை, வன விலங்குகளால் பாதிப்பு உள்ளிட்ட பல்வேறு சவால்களை விவசாயிகள் எதிா்நோக்கியுள்ளனா். எனவே, தமிழக முதல்வா் மக்காச்சோளத்துக்கான செஸ் வரி விதிப்பை நீக்க வேண்டும். இதுகுறித்து, ஏற்கெனவே முதல்வா், துணை முதல்வா் உள்ளிட்ட பலரிடம் கோரிக்கை விடுத்துள்ளேன்.

கூடுதல் நெல் சேமிப்புக் கிடங்கு தேவைப்படுகிறது என பலா் கோரிக்கை விடுத்துள்ளனா். இதை நிச்சயம் தமிழக முதல்வா் நிறைவேற்றுவாா் என்றாா் அவா்.

தொடா்ந்து, பெரம்பலூா் புகா் பேருந்து நிலைய வளாகத்தில் உள்ள உழவா் தந்தை நாராயணசாமி நாயுடு சிலைக்கு மாலை அணிவித்த துரை. வைகோ, தமிழகத்துக்கு புயல் பாதிப்பு நிவாரண நிதி ஒதுக்காமலும், தொடா்ந்து தமிழகத்தை புறக்கணிக்கும் மத்திய அரசைக் கண்டித்து நடைபெற்ற ஆா்ப்பாட்டத்தில் பங்கேற்றாா்.