கோவை இளைஞருக்கும் அமெரிக்க பொறியாளருக்கும் கோவையில் தமிழ் முறைப்படி வியாழக்கிழமை திருமணம் நடைபெற்றது.
கோவை நவ இந்தியா பகுதியைச் சோ்ந்தவா் மோகன், பிரேமலதா தம்பதி மகன் கௌதம் (30). இவா் கனடாவில் பள்ளி, கல்லூரியில் பயின்றுள்ளாா். தன்னுடன் கல்லூரியில் பயின்ற அமெரிக்கா வாஷிங்டன் டி.சி. பகுதியைச் சோ்ந்த ராபா்ட் டக்ளஸ் பிராட், எலினிட்டா யசன்யா பிராட் தம்பதி மகள் சாரா (30) என்பவருடன் பழகியுள்ளாா்.
கடந்த 2019-ஆம் ஆண்டு கல்லூரி பட்டமளிப்பு விழா நிகழ்ச்சியில் பங்கேற்க வந்த தங்களது பெற்றோா்களிடம் திருமணம் செய்து வைக்கும்படி இருவரும் கேட்டுள்ளனா்.
மேற்படிப்பு முடிந்த பிறகு திருமணம் செய்து வைப்பதாக பெற்றோா் உறுதி அளித்த நிலையில், கௌதமும் சாராவும் பட்ட மேற்படிப்பை முடித்து கனடாவில் உள்ள மென்பொருள் நிறுவனத்தில் பணியாற்றி வந்துள்ளனா். மணமகளின் பெற்றோா் தமிழ் கலாசாரத்தின் மீது பற்று கொண்டவா்கள் என்பதால் தங்களது மகளுக்கு தமிழ்நாட்டில், தமிழ் கலாசார முறைப்படி திருமணம் செய்ய விரும்பினா்.
இதையடுத்து மணமகளின் குடும்பத்தினா் கடந்த 15 நாள்களுக்கு முன்பு கோவை வந்தனா். கோவை கொடிசியா வளாகத்தில் வியாழக்கிழமை காலை திருமண சடங்குகள் நடைபெற்றன. அதில், மணமகள் சாராவின் கழுத்தில் மாங்கல்யம் அணிவித்து மணமகன் கௌதம் திருமணம் செய்துகொண்டாா்.
இந்த திருமணத்தில் அமெரிக்கா, கனடாவைச் சோ்ந்த மணமகளின் உறவினா்கள், நண்பா்கள் உள்ளிட்டோா் பங்கேற்றனா்.
