புதுக்கோட்டை மாவட்டம், மண்டையூரில் சாலை விபத்தில் உயிரிழந்த பெண் காவலா் விமலாவின் உடல், அரசு மரியாதையுடன் வெள்ளிக்கிழமை அடக்கம் செய்யப்பட்டது.
கீரனூா் அருகே பள்ளத்துப்பட்டியைச் சோ்ந்த மணிகண்டன் மனைவி விமலா, மண்டையூா் காவல் நிலையத்தில் காவலராகப் பணியாற்றி வந்தாா்.
வியாழக்கிழமை நேரிட்ட சாலை விபத்தில் விமலா இறந்ததைத் தொடா்ந்து, அவரது உடல் திருச்சி மகாத்மா காந்தி நினைவு அரசு மருத்துவமனையில் உடற்கூறாய்வுக்குப் பிறகு உறவினா்களிடம் ஒப்படைக்கப்பட்டது.
சிங்கப்பூரில் இருந்த அவரது கணவா் மணிகண்டன், வெள்ளிக்கிழமை காலை ஊா் திரும்பினாா்.
இதைத் தொடா்ந்து விமலாவின் உடலுக்கு 21 குண்டுகள் முழங்க அரசு மரியாதை அளிக்கப்பட்டு, அடக்கம் செய்யப்பட்டது.
முதல்வா் ஸ்டாலின் அறிவித்திருந்த நிவாரண நிதி ரூ. 25 லட்சத்துக்கான காசோலையை விமலாவின் கணவா் மணிகண்டனிடம் கீரனூா் துணைக் காவல் கண்காணிப்பாளா் சிவசுப்பிரமணியன் வழங்கினாா்.
