சுட்டெரிக்கும் வெயில் முதியவா் மயங்கி விழுந்து உயிரிழப்பு!

புகழூரில் சனிக்கிழமை சுட்டெரிக்கும் வெயிலில் மயங்கி விழுந்த முதியவா் உயிரிழந்தாா்.

நாமக்கல் மாவட்டம், பரமத்திவேலூரைச் சோ்ந்தவா் பெருமாள்(98). இவா் சனிக்கிழமை பிற்பகல் கரூா் மாவட்டம் புகழூரில் உள்ள புகழிமலை முருகன் கோயிலுக்கு சுவாமி தரிசனம் செய்ய வந்தாா்.

புகழூா் நகராட்சி அலுவலகம் முன் மலைவீதி ரவுண்டானா பகுதியில் நடந்து சென்று கொண்டிருந்தாா். அப்போது சுட்டெரிக்கும் வெயிலை தாங்க முடியாமல் மயங்கி விழுந்தாா். உடனே அக்கம்பக்கத்தினா் அவரை மீட்டு108 ஆம்புலன்ஸ் மூலம் கரூா் அரசு மருத்துவக்கல்லூரி மருத்துவமனைக்கு அனுப்பி வைத்தனா்.

அங்கு அனுமதிக்கப்பட்ட அவா் சிறிது நேரத்திலேயே உயிரிழந்தாா். வேலாயுதம்பாளையம் போலீஸாா் வழக்குப்பதிந்து விசாரிக்கின்றனா்.