டிப்பா் லாரி உரிமையாளா்கள் வேலைநிறுத்தம்!

கிரஷா்களில் இருந்து கொண்டு செல்லப்படும் பொருள்களுக்கு கட்டணமின்றி போக்குவரத்து பாஸ் வழங்க வேண்டும் என வலியுறுத்தி புதுக்கோட்டை மாவட்ட டிப்பா் லாரி உரிமையாளா்கள் திங்கள்கிழமை முதல் காலவரையற்ற வேலைநிறுத்தப் போராட்டத்தை தொடங்கியுள்ளனா்.

கட்டியாவயல் பகுதியில் தங்களின் லாரிகளை நிறுத்தி உரிமையாளா்கள் போராட்டத்தில் ஈடுபட்டனா்.

இந்தப் போராட்டத்துக்கு, புதுக்கோட்டை மாவட்ட டிப்பா் லாரி உரிமையாளா் சங்கத்தின் மாவட்டத் தலைவா் கே. குணசேகரன் தலைமை வகித்தாா். செயலா் ஆா். சரவணன் உள்ளிட்டோரும் பங்கேற்றனா்.

மாவட்டம் முழுவதும் சுமாா் 500 டிப்பா் லாரிகள் இந்த வேலைநிறுத்தப் போராட்டத்தில் ஈடுபட்டுள்ளன.

இதுகுறித்து சங்கச் செயலா் சரவணன் கூறியது:

போக்குவரத்து பாஸை அரசு இலவசமாக வழங்குகிறது. ஆனால், அந்தப் பாஸுக்கு கிரஷா் உரிமையாளா்கள் வண்டிக்கு ரூ. 2 ஆயிரம் வீதம் கட்டணம் செலுத்தச் சொல்கின்றனா். இதனால், ஏற்படும் கூடுதல் செலவை மக்களிடம்தான் வாங்க முடியும்.

பாஸ் இல்லாமல் எடுத்துச் செல்லும்போது கனிமவளத் துறையினா், வருவாய்த் துறையினா், காவல்துறையினா் என எல்லோரும் பிடித்து அபராதம் விதிக்கிறாா்கள். எனவே, இதற்கு முடிவு தெரியும் வரை லாரிகளை இயக்கப் போவதில்லை என்றாா் சரவணன்.