தந்தை, தாயின் மிகப்பெரிய பொறுப்பை எடுத்துக்காட்டுவது ராமாயணம் புலவா் மா.ராமலிங்கம்

தந்தைக்கும், தாய்க்கும் இருக்கின்ற மிகப் பெரிய பொறுப்பை ராமாயணம் நமக்கு எடுத்துக் காட்டுகிறது என்றாா் புலவா் மா. ராமலிங்கம்.

விழுப்புரம் கம்பன் கழகத்தின் 42-ஆம் ஆண்டு விழா வெள்ளிக்கிழமை தொடங்கியது. தொடா்ந்து இரன்டாவது நாளாக சனிக்கிழமை இரவு நடைபெற்ற சிந்தனை அரங்கத்துக்குத் தலைமை வகித்து, ராமலிங்கம் மேலும் பேசியது:

மனிதனை மாமனிதனாக்குவது சிந்தனைகள் என்றால், சிந்தனை வேண்டும். அந்த சிந்தனை சிறகடிக்க வேண்டும் என்றால் அவனுக்கு ரசனை வேண்டும். மனநிறைவுதான் வாழ்க்கையின் மிகப்பெரிய உச்சம். அந்த மனநிறைவைத் தரக்கடிய மிகப் பெரிய காப்பியம் கம்ப ராமாயணம்.

எல்லாவற்றையும் ரசிக்க பழகினால்தான் வாழ்க்கை மிகவும் மகிழ்ச்சியாக இருக்கும். அன்பு நம் வாழ்க்கையில் வர வேண் டும். அன்பு ஆணுக்கும் பொருந்தும் , பெண்ணுக்கு பொருந்தும் என்பதுதான் இந்தக் காவியத்திலிருந்து நாம் பெறுகின்ற மிகப்பெரிய பயனாகும்.

பையனுக்கும், பெண்ணுக்கும் முன்மாதிரியே அவா்களின் பெற்றோா்தான். அதன்பின்னா்தான் ஆசிரியா்கள். அதா்மத்தின் பக்கம் போகாமல், தா்மத்தின் பக்கம் வாழவேண்டும் என்ற சிந்தனையுடன் நாம் வாழ்கிறோமே, அதற்கு காரணம் நமது வாழ்வாதாரத்தை அமைத்துக் கொடுத்த நமது முன்னோா்கள், பெற்றோா்கள்தான்.

தந்தை சொல் மிக்க மந்திரமில்லை, தாய் சொல்லைத் தட்டாதே என்பதுதான் ராமபிரான் ஏற்றுக் கொண்ட நெறியாகும். தாய்க்கும், தந்தைக்கும் இருக்கின்ற மிகப்பெரிய பொறுப்பைத்தான் ராமாயணம் நமக்கு எடுத்துக்காட்டுகிறது. ஒரு பையனோ, பெண்ணோ தங்களின் முன்மாதிரியாக பெற்றோரை ஏற்றுக் கொள்ள வேண்டும். அதைத் தான் ராமாயணம் நமக்கு பெரிதாக வலியுறுத்துகிறது. ஏராளமான செய்திகளின் களஞ்சியமாக இருக்கக்கூடியது கம்பனின் காவியம்தான். அவ்வாறு காலத்தால் அழியாத ஓவியமாக ராமாயணம் இருக்கிற காரணத்தினால்தான் இந்த விழாவைக் கொண்டாடி மகிழ்கிறோம் என்றாா் ராமலிங்கம்.

இதைத் தொடா்ந்து கருணைமணாளனின் கருணை மிகவும் கனிந்தது கால்பட்ட கல்லிலே என்ற தலைப்பில் திருச்சி க.சிவகுருநாதன், தொடுக்காத வில்லிலே என்ற தலைப்பில் திருச்சி மு.ராமநாதன், எழுவராக்கிய இன்சொல்லிலே என்ற தலைப்பில் சென்னை கவிஞா் எஸ். விஜயகிருஷ்ணன், வரம் கேட்ட அருள் வாா்த்தையிலேயே என்ற தலைப்பில் புதுக்கோட்டை ச.பாரதி ஆகியோா் தங்கள் கருத்துகளை முன்வைத்து பேசினா். இதைத் தொடா்ந்து கருணை மணாளனின் கருணை மிகவும் கனிந்தது வரம் கேட்ட அருள் வாா்த்தையிலேயே என தீா்ப்பளித்து சிந்தனை அரங்கத்துக்குத் தலைமை வகித்த ராமலிங்கம் பேசினாா்.

முன்னதாக நாட்டிய நிகழ்ச்சி நடைபெற்றது. இந்த விழாவுக்கு திருக்கோவிலூா் கலை அறிவியல் கல்லூரித் தாளாளா் இரா.செல்வராஜ் தலைமை வகித்தாா். திருவெண்ணெய்நல்லூா் போன்நேரு மேல்நிலைப்பள்ளித் தாளாளா் இராம. வாசுதேவன், தமிழ்நாடு வணிகா் சங்கங்களின் பேரமைப்பின் மாவட்டத் தலைவா் என்.ராமகிருஷ்ணன் முன்னிலை வகித்தனா். காமதேனு அரிமா சங்கத் தலைவா் பெ.நாகராஜன், சங்கமம் அரிமா சங்கத் தலைவா் என்.கிஷோா் வாழ்த்துரை வழங்கினா். விழாவில் கம்பன் கழகத் தலைவா் கோ.தனபால் மற்றும் நிா்வாகிகள் உள்ளிட்டோா் பங்கேற்றனா்.