தமிழகத்தில் வெள்ளிக்கிழமை சென்னை உள்பட 13 இடங்களில் வெயில் சதமடித்துள்ளது.
இதுகுறித்து சென்னை வானிலை ஆய்வு மையம் சாா்பில் வெள்ளிக்கிழமை வெளியிடப்பட்ட செய்திக் குறிப்பு:
தமிழகத்தில் வெள்ளிக்கிழமை அதிகபட்சமாக, மதுரை விமான நிலையத்தில் 106.16 டிகிரி ஃபாரன்ஹீட் வெப்பநிலை பதிவானது. மதுரைநகரம், வேலூா் - 104, நாகை - 102.92, சென்னை மீனம்பாக்கம் - 102.76, திருச்சி - 101.66, ஈரோடு - 101.48, தூத்துக்குடி - 101.3, திருத்தணி - 100.76, சென்னை நுங்கம்பாக்கம், தஞ்சாவூா், பாளையங்கோட்டை, பரமத்திவேலூா் - 100.4 டிகிரி என மொத்தம் 13 இடங்களில் வெயில் சதமடித்துள்ளது. காரைக்காலில் 101.3 டிகிரி ஃபாரன்ஹீட்டும், புதுச்சேரியில் 100.04 டிகிரியும் வெப்பநிலை பதிவானது.
தமிழகத்தில் சனி, ஞாயிற்றுக்கிழமைகளில் (ஜூலை 12, 13) தமிழகம், புதுச்சேரி மற்றும் காரைக்காலில் ஒருசில இடங்களில் அதிகபட்ச வெப்பநிலை இயல்பைவிட 2 முதல் 3 டிகிரி செல்சியஸ் அதிகமாக இருக்கும்.
மழை நீடிக்கும்: மேற்கு திசை காற்றின் வேக மாறுபாடு காரணமாக, தமிழகத்தில் ஓரிரு இடங்களிலும், புதுச்சேரி, காரைக்கால் பகுதிகளிலும் சனிக்கிழமை (ஜூலை 13) முதல் ஜூலை 17-ஆம் தேதி வரை இடி, மின்னலுடன் கூடிய மிதமான மழைக்கு வாய்ப்புள்ளது.
இதில் ஜூலை 15 முதல் ஜூலை 17-ஆம் தேதி வரை நீலகிரி மற்றும் கோவை மாவட்டங்களின் மலைப் பகுதிகளில் ஓரிரு இடங்களில் பலத்த மழை பெய்ய வாய்ப்புள்ளது.
சென்னை மற்றும் புறநகா் பகுதிகளில் சனிக்கிழமை (ஜூலை 12) லேசான மழைக்கு வாய்ப்புள்ளது. எனினும் அதிகபட்ச வெப்பநிலை 102 டிகிரி ஃபாரன்ஹீட்டையொட்டி இருக்கும் எனத் தெரிவிக்கப்பட்டுள்ளது.
