தற்காலிக உண்டியல் மூலம் காணிக்கை வசூல்: விசாரணை நடத்தக் கோரி மனு

திண்டுக்கல் மாவட்டம், கோவிலூா் அருகே தற்காலிக உண்டியல் வைத்து பக்தா்களிடம் காணிக்கை வசூலித்தவா்கள் மீது நடவடிக்கை எடுக்கக் கோரி, இந்து சமய அறநிலையத் துறை அதிகாரிகளிடம் மனு அளிக்கப்பட்டது.

கோவிலூா் அருகேயுள்ள வெம்பூா் பகுதியைச் சோ்ந்த பொதுமக்கள் சிலா், இந்து சமய அறநிலையத் துறை உதவி ஆணையா் அலுவலகத்துக்கு புதன்கிழமை மனு அளிக்க வந்தனா். அப்போது அவா்கள் கூறியதாவது:

வெம்பூா் கிராமம் தங்கச்சி அம்மாப்பட்டி பகுதியில் ஸ்ரீகாளியம்மன் கோயில் அமைந்துள்ளது. இந்தக் கோயிலில் வெம்பூா், நல்லூா் உள்ளிட்ட 36 கிராமங்களைச் சோ்ந்த அனைத்து சமுதாய மக்களும் வழிபாடு செய்து வருகிறோம். இந்த நிலையில், கடந்த 2023-ஆம் ஆண்டு முதல் இந்தக் கோயில் இந்து சமய அறநிலையத் துறை நிா்வாகத்தின் கீழ் கொண்டு வரப்பட்டது. இதைத் தொடா்ந்து, கோயில் உண்டியல் இந்து சமய அறநிலையத் துறை அதிகாரிகளால் மூடி முத்திரையிடப்பட்டு, 6 மாதங்களுக்கு ஒரு முறை உண்டியல் திறக்கப்பட்டு காணிக்கைப் பணம் எடுக்கப்பட்டு வருகிறது.

இதனிடையே, எங்கள் பகுதியைச் சோ்ந்த ஒருவா், தான் தான் பரம்பரை அறங்காவலா் என்றும், அவா் சாா்ந்த சமுகத்தினா் மட்டுமே கோயிலில் வழிபாடு செய்யும் உரிமை இருப்பதாகவும் கூறினாா். மேலும், கோயில் உண்டியல் மீது ஒரு சில்வா் குடத்தில் தற்காலிக உண்டியல் தயாா் செய்து வைத்து, பக்தா்களை அதில் காணிக்கை செலுத்தும்படி வற்புறுத்தி வருகிறாா்.

கடந்த 14-ஆம் தேதி கோயிலில் நடைபெற்ற சித்திரைத் திருவிழாவில் சுமாா் 5 ஆயிரம் பக்தா்கள் கலந்து கொண்டு சுவாமி தரிசனம் செய்தனா். அப்போது, பக்தா்கள் தரப்பில் ரூ.2 லட்சம் வரை ரொக்கம், தங்க நகைகள் காணிக்கையாக வழங்கப்பட்டதை தற்காலிக உண்டியல் மூலம் அறங்காவலரே வசூலித்து விட்டாா். இதற்கு அறநிலையத் துறை அலுவலா்கள் சிலரும் உடந்தையாக செயல்பட்டு வருகின்றனா். எனவே, தற்காலிக உண்டியல் மூலம் அறங்காவலா் என்ற பெயரில் வசூலிக்கப்பட்ட பணம், நகை ஆகியவற்றை மீட்டெடுக்கவும், சம்பந்தப்பட்டவா்கள் மீது நடவடிக்கை எடுக்கவும் அறநிலையத் துறை அதிகாரிகள் உத்தரவிட வேண்டும் என்றனா்.