சமூகப் பிழைகளையும் திருத்தும் பொறுப்பு ஆசிரியா்களுக்கு உண்டு: இரா. சச்சிதானந்தம் எம்பி

மாணவா்களின் பிழைகளைத் திருத்தும் ஆசிரியா்களுக்கு, சமூகப் பிழைகளையும் திருத்தும் பொறுப்பு இருப்பதாக திண்டுக்கல் தொகுதி மக்களவை உறுப்பினா் இரா. சச்சிதானந்தம் தெரிவித்தாா்.

தமிழ்நாடு ஆரம்பப் பள்ளி ஆசிரியா் கூட்டணியின் 7-ஆவது மாநில மாநாடு திண்டுக்கல்லில் வியாழக்கிழமை தொடங்கியது. மே 1 முதல் 3-ஆம் தேதி வரை நடைபெறும் இந்த மாநாட்டின் தொடக்க நிகழ்வுக்கு, ஆரம்பப் பள்ளி ஆசிரியா் கூட்டணியின் மாநிலத் தலைவா் மூ. மணிமேகலை தலைமை வகித்தாா். மாநாட்டு வரவேற்புக் குழுத் தலைவா் பேராசிரியா் ரெ. மனோகரன் வரவேற்றாா். இதில் சிறப்பு அழைப்பாளராக திண்டுக்கல் மக்களவைத் தொகுதி உறுப்பினா் இரா. சச்சிதானந்தம் கலந்து கொண்டு பேசியதாவது:

மாணவா்களின் பிழைகளைத் திருத்தும் ஆசிரியா்களுக்கு, சமூகப் பிழைகளையும் திருத்தக் கூடிய பொறுப்பு உள்ளது. அந்த வகையில் தான் இன்றைய சூழலை உணா்ந்து, அரசு, அரசு உதவிப் பெறும் பள்ளிகளைப் பாதுகாப்போம் என்ற கோரிக்கையை இந்த மாநாட்டின் தலைப்பாக அமைத்திருக்கின்றனா். சமூகத்தின் கோரிக்கைகளையும், பிரச்னைகளையும் ஆசிரியா்களும் விவாதிக்க வேண்டும்.

கல்விப் பணியை மாநில அரசு நிா்வகித்து வந்தாலும், இதனை கண்காணிக்கும் அதிகாரத்தை மத்திய அரசு வைத்திருக்கிறது. மாதிரிப் பள்ளிகள் தமிழகத்தில் ஏற்கெனவே உருவாக்கப்பட்டு, நாட்டுக்கே முன் மாதிரியாக திகழ்கிறது. இந்தச் சூழலில் பிஎம் ஸ்ரீ மாதிரிப் பள்ளிகளை உருவாக்கினால் மட்டுமே கல்விக்கான நிதியை விடுவிப்போம் என மத்திய அரசு, மாநில அரசை நிா்ப்பந்தித்து வருகிறது. அரசுப் பள்ளிகளைப் பாதுகாப்பது மத்திய அரசின் நோக்கம் கிடையாது. தேசிய கல்விக் கொள்கை மூலம், அரசுப் பள்ளிகளை தனியாா் மயமாக்கும் முயற்சியில் மத்திய அரசு ஈடுபட்டு வருகிறது.

எல்லா மொழிகளுக்கும் அங்கீகாரம் கொடுக்க வேண்டும் என கோரிக்கை விடுத்து வரும் நிலையில், தேசிய மொழி என ஒரு குறிப்பிட்ட மொழியை மட்டும் திணிப்பது தேவையற்றது.

அரசியல் அமைப்புச் சட்டத்தின் அடிப்படையில் தான் இந்தியா உருவாக்கப்பட்டிருக்கிறது. முகப்புரையின் அடிப்படையில் தான் இந்தியா உருவாக்கப்பட்டிருக்கிறது என்பதை மாணவா்களுக்கு தெரிவித்து, அனைவருக்குமான இந்தியா என்ற கருத்தை இளைய தலைமுறையினரிடம் ஆசிரியா்கள் கொண்டு செல்ல வேண்டும் என்றாா் அவா்.

இதைத் தொடா்ந்து, ‘இந்திய அரசியலமைப்பும், மாணவா்கள் கல்வி உரிமையும்’ என்ற தலைப்பில் உயா்நீதிமன்ற வழக்குரைஞா் தி. லஜபதிராய், ‘சமூக நீதியைத் தகா்க்கும் தேசியக் கல்விக் கொள்கை’ என்ற தலைப்பில் பு.பா. பிரின்ஸ் கஜேந்திரபாபு ஆகியோா் கருத்துரையாற்றினா். இதையடுத்து நடைபெற்ற பிரதிநிதிகள் மாநாட்டில் அனைத்திந்திய ஜனநாயக மாதா் சங்கத்தின் அகில இந்தியத் துணைத் தலைவா் உ. வாசுகி, ஆரம்பப் பள்ளி ஆசிரியா் கூட்டணியின் பொதுச் செயலா் ச. மயில் உள்ளிட்ட பலா் கலந்து கொண்டனா்.