தவெக கூட்டணி குறித்து ஜோதிடம் கூற இயலாது: முன்னாள் அமைச்சா் சி.சீனிவாசன்

அதிமுக, தவெக (தமிழக வெற்றிக் கழகம்) கூட்டணி அமையுமா என்பது குறித்து தற்போது ஜோதிடம் கூற முடியாது என முன்னாள் அமைச்சா் சி.சீனிவாசன் தெரிவித்தாா்.

திண்டுக்கல் மேற்கு மாவட்ட அதிமுக சாா்பில் இளைஞா், இளம் பெண்கள் பாசறைக்கான உறுப்பினா் சோ்க்கை படிவம் வழங்கும் நிகழ்ச்சி வியாழக்கிழமை நடைபெற்றது. நிகழ்ச்சிக்கு முன்னாள் அமைச்சரும், அதிமுக பொருளாளருமான சி.சீனிவாசன், முன்னாள் அமைச்சா்கள் எஸ்.பி.வேலுமணி, ஆா்பி.உதயகுமாா் ஆகியோா் தலைமை வகித்தனா். இளைஞா், இளம் பெண்கள் பாசறை மாநிலச் செயலா் பா.பரமசிவம் முன்னிலை வகித்தாா்.

பின்னா், செய்தியாளா்களிடம் முன்னாள் அமைச்சா் சி.சீனிவாசன் கூறியதாவது:

தமிழகத்தில் சட்டம்-ஒழுங்கு சீா்கெட்டுவிட்டது. காவல் துறையின் கைகள் கட்டப்பட்டுள்ளன. தவெக கட்சியுடன் கூட்டணி அமையுமா என்பது குறித்து தற்போது ஜோதிடம் கூற முடியாது. தோ்தல் நேரத்தில் கூட்டணி குறித்த முடிவை அதிமுக பொதுச் செயலா் எடப்பாடி பழனிச்சாமி அறிவிப்பாா்.

வன்னியா்களுக்கான 10.5 சதவீத இட ஒதுக்கீடு குறித்து, பாமக நிறுவனா் ராமதாஸ் சண்டையிட்டு வருகிறாா். பதில் சொல்ல வேண்டியது முதல்வரின் கடமை என்றாா்.

கூட்டத்தில் அதிமுக அமைப்புச் செயலா் மருதராஜ், சட்டப்பேரவை முன்னாள் உறுப்பினா்கள் தென்னம்பட்டி எஸ்.பழனிசாமி, பிரேம்குமாா் உள்ளிட்ட பலா் கலந்து கொண்டனா்.