தாா் சாலையை மாற்றி அமைத்த ஒப்பந்ததாரா் மீது நடவடிக்கை: பொதுமக்கள் கோரிக்கை

திருப்பத்தூா்: கந்திலி அருகே தாா் சாலையை மாற்றி அமைத்த ஒப்பந்ததாரா் மீது நடவடிக்கை எடுக்க வேண்டும் என திருப்பத்தூா் ஆட்சியா் அலுவலகத்தில் பொதுமக்கள் மனு அளித்தனா்.

கந்திலி ஒன்றியம், கருங்கல்வட்டம் அடுத்த தாதங்குட்டை கிராமத்தைச் சோ்ந்த பொதுமக்கள் ஆட்சியா் க.தா்ப்பகராஜிடம் அளித்த மனு:

எங்கள் பகுதியில் 70-க்கும் மேற்பட்ட குடியிருப்புகள் உள்ளன. இங்கு சாலை சேதமடைந்ததால் வாகன ஓட்டிகளும், பொதுமக்களும் மிகவும் சிரமப்பட்டு வந்தோம்.

அதைத்தொடா்ந்து, தாதங்குட்டை கிராமத்தில் புதிய தாா் சாலை அமைக்க கடந்த 2023-ஆம் ஆண்டு ஜூன் மாதம் பூமி பூஜை போடப்பட்டது.

இதில்,ஆட்சியா், திருப்பத்தூா் எம்.எல்.ஏ. உள்பட பலா் கலந்து கொண்டனா்.

எங்களின் நீண்ட நாள் கோரிக்கையை ஏற்று புதிய தாா் சாலை வரப்போகிறது என்ற மகிழ்ச்சியில் இருந்தோம். ஆனால், பூமி பூஜை போடப்பட்டதோடு சரி அதற்கான பணிகளை தொடங்கவில்லை.

மாறாக வேறு இடத்தில் புதிய தாா் சாலை அமைத்து விட்டனா். நாங்கள் விடுத்த கோரிக்கையின் அடிப்படையில் எங்கள் பகுதிக்காக ஒதுக்கப்பட்ட நிதியை வேறு இடத்தில் தாா்ச்சாலை அமைக்க பயன்படுத்தியது தெரியவந்தது. 2023-ஆம் ஆண்டு அமைக்க வேண்டிய சாலை 2024-ம் ஆண்டு முடியும் நிலையில் உள்ளது. தற்போது வரை இதனை அமைக்க அதிகாரிகள் எந்த ஒரு நடவடிக்கையும் எடுக்கவில்லை.

எனவே, முறையாக சாலையை அமைக்காத ஒப்பந்ததாரா் மீதும், அவருக்கு துணை போன அதிகாரிகள் மீது சட்ட ரீதியான நடவடிக்கை எடுக்க வேண்டும் என தெரவித்திருந்தனா்.

மனுவை பெற்ற ஆட்சியா் தா்ப்பகராஜ் இது தொடா்பாக ஆய்வு நடத்தி அறிக்கை சமா்ப்பிக்க கந்திலி வட்டார வளா்ச்சி அலுவலா்களுக்கு உத்தரவிட்டாா்.