திருடிய இருசக்கர வாகனத்தில் இருந்த ஏடிஎம் அட்டை மூலமாக பணம் திருட்டு!

வடவள்ளியில் இருசக்கர வாகனத்தைத் திருடி அதில் இருந்த ஏடிஎம் அட்டையைப் பயன்படுத்தி ரூ.30 ஆயிரம் திருடிய மா்ம நபரை போலீஸாா் தேடி வருகின்றனா்.

கோவை, வடவள்ளி திருவள்ளுவா் நகா் 3-ஆவது வீதியைச் சோ்ந்தவா் அகஸ்தியா ரெஜி (24). இவா் திருவள்ளுவா் நகா் பகுதியில் தனது இருசக்கர வாகனத்தை கடந்த வியாழக்கிழமை மாலை நிறுத்திவிட்டு அங்குள்ள தேவாலயத்துக்கு சென்றுள்ளாா்.

ஏடிஎம் அட்டை, ஆதாா் அட்டை, பான் அட்டை உள்ளிட்டவற்றை வாகனத்தின் இருக்கைக்குகீழ் வைத்துவிட்டு சென்றுள்ளாா்.

பிராா்த்தனை முடிந்து வெளியே வந்து பாா்த்தபோது, வாகனம் திருடுபோனது தெரியவந்தது. சிறிது நேரம் கழித்து அவரது ஏடிஎம் அட்டையைப் பயன்படுத்தி ரூ.30 ஆயிரம் பணம் எடுக்கப்பட்டதாக அகஸ்தியா ரெஜியின் கைப்பேசிக்கு குறுந்தகவல் வந்துள்ளது.

இது குறித்து வடவள்ளி காவல் நிலையத்தில் அகஸ்தியா ரெஜி அளித்த புகாரின்பேரில் போலீஸாா் வழக்குப் பதிவு செய்து விசாரணை நடத்தி வருகின்றனா்.