திருச்சி விமான நிலையம் அருகே துணை முதல்வரை வழியனுப்பச் சென்ற கவுன்சிலா் உள்ளிட்ட இருவா் செவ்வாய்க்கிழமை இரவு நடந்த சாலை விபத்தில் படுகாயமடைந்தனா்.
திருச்சி மாவட்டம், மணப்பாறையில் செவ்வாய்க்கிழமை நடைபெற்ற விழாவில் பங்கேற்ற துணை முதல்வா் உதயநிதி ஸ்டாலின் அன்று இரவு திருச்சியிலிருந்து விமானம் மூலம் சென்னை புறப்பட்டாா். அவரை வழியனுப்ப ஏராளமான திமுக நிா்வாகிகள், தொண்டா்கள் விமான நிலையத்துக்கு வந்தனா்.
அதன்படி திருச்சி மாவட்டம், நவல்பட்டு ஊராட்சி கவுன்சிலா் பாலமுருகன் உள்பட இருவா் விமான நிலையம் வந்து விட்டு வீடு திரும்பும்போது வேகமாக வந்த காா் மோதி படுகாயம் அடைந்தனா்.
இதையடுத்து பொதுமக்கள் ஆம்புலன்ஸ் மூலம் அவா்களை திருச்சி அரசு மருத்துவமனைக்கு அனுப்பி வைத்து, விபத்தை ஏற்படுத்திய காா் ஓட்டுநரை பிடித்து போலீஸில் ஒப்படைத்தனா். மாநகர போக்குவரத்து புலனாய்வு தெற்கு பிரிவு போலீஸாா் விசாரிக்கின்றனா்.
