துணை வட்டாட்சியா் பணி: இடஒதுக்கீடு விவரம் வெளியீடு

புதுவையில் துணை வட்டாட்சியா்கள் 30 போ் புதிதாக நியமிக்கப்பட விண்ணப்பங்கள் புதன்கிழமை முதல் விநியோகிக்கப்பட்ட நிலையில், அதற்கான இட ஒதுக்கீடு விவரங்களும், வயது சலுகை விவரங்களும் அறிவிக்கப்பட்டுள்ளன.

துணை வட்டாட்சியா் பணி தோ்வுக்காக புதன்கிழமை (மே 28) முதல் ஜூன் 27-ஆம் தேதி வரை இணைய வழியில் விண்ணப்பிக்க அறிவுறுத்தப்பட்டுள்ளது.

30 துணை வட்டாட்சியா் பணியிடங்களில் இடஒதுக்கீடு பின்பற்றப்படுவதாகவும், அதன்படி இடஒதுக்கீடு அல்லாத (யூஆா்) பிரிவுக்கு 12, பொருளாதாரத்தில் நலிந்த பிரிவினா் (இடபிள்யூஎஸ்) 3, மிகவும் பிற்படுத்தப்பட்டோா் (எம்பிசி) 5, தாழ்த்தப்பட்டோா் (எஸ்சி) 5, இதர பிரிவினா் (ஓபிசி) 3, முஸ்லிம் (பிசிஎம்) 1, பொருளாதாரத்தில் பிற்படுத்தப்பட்டோா் 1 மற்றும் மாற்றுத்திறனாளிகளுக்கான கூடுதலாக ஓரிடம் எனக் குறிப்பிடப்பட்டுள்ளது.

வயது வரம்பு சலுகையாக மிகவும் பிற்படுத்தப்பட்டோா், இதர பிரிவினா், முஸ்லீம் பிரிவு (பிசிஎம்) ஆகியோருக்கு 3 ஆண்டுகளும், தாழ்த்தப்பட்டோருக்கு 5 ஆண்டுகளும், முன்னாள் ராணுவ வீரா்களுக்கு அவா்கள் பணி ஆண்டுகளுடன் கூடுதலாக 3 ஆண்டு, முக்கிய ராணுவப் பணிகளில் ஈடுபட்டவா்களுக்கு பொதுவாக 3 ஆண்டுகளும், தாழ்த்தப்பட்டோருக்கு 8 ஆண்டுகளும் அளிக்கப்பட்டுள்ளது.

விண்ணப்பதாரா்களுக்கான விதிமுறைகள், தோ்வு வினா பாடமுறை மற்றும் இடஒதுக்கீடு சதவீதம் என பணியில் சேருவது குறித்த சட்ட விதிமுறைப்படியான விளக்கங்களும் வெளியிடப்பட்டுள்ளன.

விண்ணப்பங்கள் உள்ளிட்டவை குறித்த சந்தேகங்களுக்கு 0413-2299567 என்ற தொலைபேசியில் தொடா்பு கொள்ளலாம் என்று ஆட்சியா் அ.குலோத்துங்கன் வெளியிட்ட செய்திக் குறிப்பில் தெரிவிக்கப்பட்டுள்ளது.