தூத்துக்குடி: `எவ்வளவு சொல்லியும் கேட்கல; தினமும் குடிச்சிட்டு தகராறுதான்’ - மகனையே கொலை செய்த தந்தை

தூத்துக்குடி மாவட்டம், கோவில்பட்டி அருகேயுள்ள தோணுகாலைச் சேர்ந்தவர் பாலமுருகன். கட்டடத் தொழிலாளியான இவரது மனைவி கற்பகம். இவர்களுக்கு 5-ம் வகுப்பு படித்து வரும் பாண்டிச்செல்வி என்ற மகளும், 1-ம் வகுப்பு படித்து வரும் அகிலன் என்ற மகனும் உள்ளனர். பாலமுருகனின் தந்தை பிரியாதரன்  அவருடன் வசித்து வந்தார். கட்டட வேலைக்குச் சென்று வந்த பாலமுருகனுக்கு குடிப்பழக்கம் இருந்துள்ளது. இதனால், அடிக்கடி மனைவி, குழந்தைகளுடன் தகராறில் ஈடுபடுவதும், அடிப்பதுமாக இருந்துள்ளார். இதனை பாலமுருகனின் தந்தை பிரியாதரன் தொடர்ந்து கண்டித்து வந்துள்ளார்.

இந்த நிலையில் நேற்று மாலை வேலைக்குச் சென்று வந்த பாலமுருகன் குடிபோதையில் வீட்டிற்கு வந்துள்ளார். வழக்கம் போல் மனைவியிடம் தகராறு செய்துள்ளார். ”வேலைக்குச் சென்று வந்த பணத்தை குடித்து அழித்தால் எப்படி குழந்தைகளை காப்பாற்றுவாய்?” என பிரியாதரன்  கேட்டதற்கு பாலமுருகன் அவரிடமும் தகராறு செய்துள்ளாராம். இதனால் தந்தை, மகன் இருவருக்கும் வாக்குவாதம் ஏற்பட்டு கைகலப்பானது. ஒருவரை ஒருவர் தாக்கிக் கொண்டனராம்.  பின்னர் அனைவரும் இரவில் சாப்பிட்டுவிட்டு தூங்கச் சென்றனர்.

இந்த நிலையில், அதிகாலையில் சுமார் 5 மணிக்கு எழுந்த பிரியாதரன், தன்னை மகன் தாக்கிய ஆத்திரம் தாங்க முடியாமல் வீட்டின் வெளியே கிடந்த மண்வெட்டியை எடுத்து வந்து தூங்கிக் கொண்டிருந்த பாலமுருகனின் கழுத்தில் ஓங்கி வெட்டினார். இதில், பாலமுருகன் உயிரிழந்தார். ஆனால், மழை பெய்துக் கொண்டிருந்ததால் பாலமுருகனின் அலறல் சத்தம் யாருக்கும் கேட்கவில்லை. காலை 6 மணிக்கு எழுந்த பாலமுருகனின் மகள் பாண்டிச் செல்வி வீட்டிற்கு வெளியே வந்து பார்த்த போது தந்தை ரத்த வெள்ளத்தில் இறந்து கிடப்பதைப் பார்த்து அலறி சத்தம் போட்டுள்ளார்.

இதற்கிடையில், பிரியாதரன் மண் வெட்டியுடன் மேற்கு காவல் நிலையத்திற்கு நடந்தே சென்று சரண் அடைந்தார்.  “தினமும் குடித்துவிட்டு என் மருமகளையும், பேரப் பிள்ளைகளையும் அடிப்பது எனக்குப் பிடிக்கவில்லை. அக்கம் பக்கத்தினர் எங்களை தவறாகப் பேச ஆரம்பித்தனர். எவ்வளவு முறையோ சொல்லியும்  என் மகன் குடிப்பழக்கத்தை கைவிட வில்லை. என்னை தாக்கிய ஆத்திரத்தில் கொலை செய்தேன்” எனப் போலீஸாரிடம் கூறியுள்ளார் பிரியாதரன்.  அவரை கைது செய்த போலீஸார் தொடர்ந்து விசாரணை செய்து வருகிறார்கள்.     

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MaperumSabaithanil