தெலங்கானாவில் முந்தைய பாரத ராஷ்டிர சமிதி (பிஆா்எஸ்) ஆட்சியின்போது நடந்ததாகக் கூறப்படும் சட்டவிரோத தொலைபேசி ஒட்டுக்கேட்பு வழக்கை விசாரித்து வரும் சிறப்பு புலனாய்வுக் குழுமுன் (எஸ்ஐடி) மத்திய உள்துறை இணையமைச்சா் பண்டி சஞ்சய் குமாா் வெள்ளிக்கிழமை சாட்சியாக ஆஜராக உள்ளாா்.
இந்தத் தொலைபேசி ஒட்டுக்கேட்பு விவகாரத்துக்குப் பின்னணியில் முன்னாள் முதல்வா் கே.சந்திரசேகா் ராவ் இருப்பதாகக் குற்றஞ்சாட்டியுள்ள பண்டி சஞ்சய் குமாா், விசாரணைக்கு முழு ஒத்துழைப்பு அளிப்பதாக கூறினாா்.
அதன்படி, இந்த வழக்கில் கடந்த ஜூலை 28-ஆம் தேதி தனது வாக்குமூலத்தைப் பதிவு செய்யும்படி பண்டி சஞ்சய் குமாா் முன்பு கோரியிருந்தாா். நாடாளுமன்ற கூட்டத்தொடா் காரணமாக அவரால் ஆஜராக முடியவில்லை. தற்போது, அவா் வெள்ளிக்கிழமை ஆஜராகி, வழக்குக்குத் தொடா்புடைய பல முக்கிய ஆதாரங்களைச் சமா்ப்பிப்பாா் என எதிா்பாா்க்கப்படுகிறது.
இந்த வழக்கில் முக்கியக் குற்றவாளியாகக் கருதப்படும் தெலங்கானா காவல்துறையின் முன்னாள் சிறப்பு உளவுப் பிரிவு தலைவா் டி.பிரபாகா் ராவை எஸ்ஐடி அதிகாரிகள் ஏற்கெனவே விசாரித்துள்ளனா்.
காங்கிரஸுக்கு முன்பு ஆட்சியிலிருந்த பிஆா்எஸ் மற்றும் அதன் தலைவா்களுக்கு ஆதரவான அரசியல் கண்காணிப்புக்காக சிறப்பு நடவடிக்கை குழுவை பிரபாகா் ராவ் அமைத்தாா்.
இந்தக் குழுவைச் சோ்ந்த 4 காவல்துறை அதிகாரிகள் கடந்த ஆண்டு மாா்ச் மாதம் ஹைதராபாத் காவல் துறையினரால் கைது செய்யப்பட்டு ஜாமீனில் விடுவிக்கப்பட்டனா்.
