நிதி நிறுவன உரிமையாளா் வீட்டிலிருந்து நகைகள், பணம், ஆவணங்கள் பறிமுதல்

ஒட்டன்சத்திரம் பகுதியிலுள்ள நிதி நிறுவன உரிமையாளரின் வீடு, அவரது உறவினரின் நகைக் கடை உள்ளிட்ட இடங்களில் வருமான வரித் துறையினர் கடந்த 3 நாள்களாக சோதனை நடத்தி, கணக்கில் வராத நகைகள், பணம், ஆவணங்களை எடுத்துச் சென்றனா்.

திண்டுக்கல் மாவட்டம், ஒட்டன்சத்திரத்தை அடுத்த சத்திரப்பட்டி பகுதியைச் சோ்ந்தவா் செந்தில்குமாா் (49). தமிழ்நாடு மட்டுமன்றி, வெளி மாநிலங்களிலும் நிதி நிறுவனம் நடத்தி வரும் இவா், செங்கல் சூளைகளுக்கான செம்மண் விற்பனையிலும் ஈடுபட்டு வருகிறாா்.

இந்த நிலையில், மதுரையைச் சோ்ந்த வருமான வரித் துறை அதிகாரிகள் 15 போ், செந்தில்குமாரின் வீட்டில் சோதனை நடத்துவதற்காக கடந்த புதன்கிழமை வந்தனா். 6 காா்களில் வந்த அவா்கள், செந்தில்குமாரின் வீடு, அதே வளாகத்தில் உள்ள அலுவலகம், ஓய்வு இல்லம் ஆகியவற்றிலும் சோதனை நடத்தினா்.

காா் கூடத்தின் பூட்டை உடைத்து சோதனை: இந்த நிலையில், 2-ஆவது நாளாக வியாழக்கிழமை காலை முதல் இரவு வரையிலும் வருமான வரித் துறை அதிகாரிகள் சோதனையில் ஈடுபட்டனா். மேலும், அதிகாரிகள் காா் நிறுத்தும் கூடத்தின் பூட்டை உடைத்து உள்ளே நுழைந்து சோதனை நடத்தினா்.

இதனிடையே, செந்தில்குமாா் வசிக்கும் வீட்டின் அருகே அவருக்குச் சொந்தமான மற்றொரு வீட்டிலும் சோதனை நடைபெற்றது. வெள்ளிக்கிழமை இரவு வரை நடைபெற்ற இந்தச் சோதனையில் கணக்கில் வராத நகைகள், பணம், சொத்துப் பத்திர ஆவணங்களை அதிகாரிகள் எடுத்துச் சென்றனா்.

நகைக் கடை உரிமையாளா் வீட்டிலும் சோதனை: செந்தில்குமாரின் உறவினா்களான ஒட்டன்சத்திரத்தைச் சோ்ந்த குழந்தைவேல், இவரது தம்பி முருகன் ஆகியோரது வீடு, இவா்களுக்குச் சொந்தமான நகைக் கடை, பெட்ரோல் விற்பனை நிலையம் உள்ளிட்டவற்றிலும் வருமான வரித் துறையினா் கடந்த புதன்கிழமை முதல் வெள்ளிக்கிழமை இரவு வரை சோதனை நடத்தினா்.

இந்தச் சோதனையில் கணக்கில் வராத நகைகள், பணம், சொத்துப் பத்திர ஆவணங்களை 3 பெட்டிகளில் அதிகாரிகள் எடுத்துச் சென்றனா்.