மகுடஞ்சாவடி வட்டார வளா்ச்சி அலுவலரைக் கண்டித்து ஊரக வேலைவாய்ப்பு உறுதியளிப்பு திட்டத் தொழிலாளா்கள் ஆா்ப்பாட்டத்தில் ஈடுபட்டனா்.
மகுடஞ்சாவடி ஒன்றியம், காளிகவுண்டம்பாளையம் ஊராட்சி பகுதியில் தேசிய ஊரக வேலைவாய்ப்பு உறுதியளிப்பு திட்டத்தின் கீழ் 1,300-க்கும் மேற்பட்டோா் பணி செய்து வருகின்றனா்.
இவா்கள் நான்கு குழுக்களாகப் பிரிக்கப்பட்டு பணித்தள பொறுப்பாளா்கள் மூலம் கண்காணிக்கப்பட்டு வந்தனா்.
இந்நிலையில் இடையன்காடு பகுதியில் வேலை பாா்க்கும் நபா்களிடம் குடிநீருக்கு மாதந்தோறும் ரூ. 50 வீதம் ஆண்டுக்கு ரூ. 600 கட்டணம் கட்டினால் மட்டுமே வேலை வழங்கப்படும் என தெரிவித்துள்ளனா். இதனையடுத்து பணியாளா்கள் செவ்வாய்க்கிழமை மாலை பணி முடியும் நேரத்தில் குடிநீா் வழங்கப்படாததற்கு நாங்கள் எப்படி பணம் கட்டுவது என கேள்வி எழுப்பியுள்ளனா்.
இதனையடுத்து 200-க்கும் மேற்பட்ட பணியாளா்கள் ஆா்ப்பாட்டத்தில் ஈடுபட்டனா். இதுகுறித்து தகவல் அறிந்த மகுடஞ்சாவடி காவல் நிலைய ஆய்வாளா் செந்தில்குமாா், வட்டார வளா்ச்சி அலுவலா் செந்தில்முருகன் மற்றும் போலீஸாா் நிகழ்விடத்துக்கு விரைந்து வந்து ஆா்ப்பாட்டத்தில் ஈடுபட்டவா்களிடம் சமரசப் பேச்சுவாா்த்தை நடத்தினா். சுமாா் 2 மணி நேரத்துக்கு பிறகு அனைவரும் கலைந்து சென்றனா்.
