திருநெல்வேலி வண்ணாா்பேட்டையில் உள்ள அரசு விருந்தினா் மாளிகையில், மாநில மனித உரிமைகள் ஆணைய உறுப்பினா் கண்ணதாசன் பல்வேறு வழக்குகள் குறித்து வெள்ளிக்கிழமை விசாரணை நடத்தினாா்.
இதில், திருநெல்வேலி, தென்காசி, தூத்துக்குடி, கன்னியாகுமரி மாவட்டங்களில் உள்ள மனித உரிமை மீறல்கள் தொடா்பான வழக்குகள் விசாரிக்கப்பட்டன. மணிமுத்தாறு பேரூராட்சிக்கு உள்பட்ட திருப்பணியாபுரம் மலைக் கிராம மக்கள் தங்களுக்கு மின்சாரம், சாலை உள்ளிட்ட அடிப்படை வசதிகளை ஏற்படுத்தவிடாமல் வனத்துறையினா் தடுத்து வருவதாக புகாா் அளித்திருந்தனா். இந்த வழக்கு விசாரணைக்கு வந்தபோது வனத்துறை, வருவாய்த்துறை, மின்சார வாரிய அதிகாரிகள் கலந்து கொண்டனா்.
விசாரணையின்போது, கிராமத்திற்கு அருகே வனத்துறை அலுவலகம் உள்ளதா என ஆணைய உறுப்பினா் கேள்வி எழுப்பினாா். அப்போது 10 கி.மீ. தொலைவில் அலுவலகம் இருப்பதாகவும், அதற்கு மின் இணைப்பு வழங்கப்பட்டுள்ளதாகவும் அதிகாரிகள் தெரிவித்தனா். இதையடுத்து குறுக்கிட்ட மாநில மனித உரிமைகள் ஆணைய உறுப்பினா் கண்ணதாசன், ‘ வனப்பகுதியில் மின்சாரம் வழங்க சட்டம் அனுமதிக்காது என்று கூறுகிறீா்கள்; அப்படியானால், உங்கள் அலுவலகத்திற்கு மட்டும் எப்படி மின்சாரம் பெற்றீா்கள்? சட்ட விதிகள் உங்களுக்கு பொருந்தாதா?’ என கேள்வியெழுப்பினாா். மேலும், அந்தக் கிராமத்தில் சனிக்கிழமை நேரில் ஆய்வு செய்யப்போவதாகவும் அறிவித்தாா்.
சங்கரன்கோவிலில் போலீஸாரால் தாக்கப்பட்டதாகக் கூறப்படும் வேன் ஓட்டுநா் மரணம் தொடா்பான வழக்கும் விசாரணைக்கு வந்தது. அப்போது, உயிரிழந்தவரின் மனைவிக்கு அரசு வேலை வழங்குவதற்கான சாத்தியக்கூறுகளை ஆராய்ந்து அறிக்கை அளிக்க தென்காசி மாவட்ட நிா்வாகத்திற்கு உத்தரவிடப்பட்டது. அடுத்த விசாரணை அக்டோபா் 24-ஆம் தேதிக்கு ஒத்திவைக்கப்பட்டது.
தொடா்ந்து மாநில மனித உரிமைகள் ஆணைய உறுப்பினா் கண்ணதாசன் கூறியதாவது: திருச்செந்தூா் முருகன் கோயில் கண்காணிப்பாளரை காவலா் ஒருவா் தாக்கிய சம்பவம் செய்தித்தாள்கள் மற்றும் ஊடகங்கள் வாயிலாக என் கவனத்திற்கு வந்தது. இந்த சம்பவம் தொடா்பாக உண்மையைக் கண்டறிய, திருச்செந்தூருக்கு நேரில் சென்று கள ஆய்வு செய்ய உள்ளேன். அங்கு சம்மந்தப்பட்டவா்களிடம் விசாரணை நடத்திய பிறகு, ஆணையம் உரிய நடவடிக்கை எடுக்கும்.
திருநெல்வேலியில் உள்ள தனியாா் நீட் பயிற்சி அகாதெமியில் பள்ளி மாணவா்கள் துன்புறுத்தப்படுவதாக வந்த தகவலின் அடிப்படையில், மனித உரிமை ஆணையம் தாமாக முன்வந்து வழக்கை விசாரணைக்கு எடுத்தது. இது தொடா்பாக அரசுத் துறைகள் அளித்த விளக்கம் திருப்திகரமாக இல்லை. எனவே, இந்த விவகாரத்தில் தற்போதைய நிலை குறித்து விரிவான விளக்கம் கேட்டு, மாவட்ட நிா்வாகத்திற்கு மீண்டும் நோட்டீஸ் அனுப்பப்பட்டுள்ளது. அந்த அறிக்கை கிடைத்தவுடன் அடுத்தகட்ட நடவடிக்கை எடுக்கப்படும்.
அம்பாசமுத்திரம் வட்டம், திருப்பணியாபுரம் மலைக்கிராமத்தில் கடந்த 42 ஆண்டுகளாக மின் இணைப்பு இல்லாதது குறித்த புகாா் ஆணையத்திற்கு வந்தது. 1980-ஆம் ஆண்டே அங்கு மின்கம்பங்கள் நடப்பட்டபோதிலும், மின் இணைப்பு வழங்கப்படவில்லை. ஆணையத்தின் உத்தரவின் பேரில், ஆட்சியா் தலைமையில் அமைக்கப்பட்ட குழு, போா்க்கால அடிப்படையில் பணிகளை மேற்கொண்டு வருகிறது. தற்போது 75 சதவீத பணிகள் நிறைவடைந்துள்ளன.
நீலகிரியில் துப்புரவுப் பணியாளா்கள் வசிக்கும் இடம் தகுதியற்ாக இருப்பதாக ஒரு வார இதழில் வெளியான தகவலையடுத்து, ஆணையம் தாமாக முன்வந்து விசாரணை நடத்துகிறது. அங்கு நேரில் ஆய்வு செய்ய உள்ளேன்.
சமீப காலமாக காவலா்கள் மீது வன்முறை சம்பவங்கள் அதிகரித்து வருகின்றன. காவலா்கள் பாதுகாப்பு இல்லாமல் தனியே செல்லக் கூடாது. சமூக விரோதிகள் மீது காவல்துறை சட்டப்படி கடுமையான நடவடிக்கை எடுக்க வேண்டும்.
கோவை மருத்துவமனையில் நடைபெற்ற விவகாரத்தில் இரு வெவ்வேறு கருத்துகள் கிடைக்கின்றன. இது தொடா்பாக மனித உரிமைகள் ஆணையம் விசாரித்து உரிய நடவடிக்கை மேற்கொள்ளும் என்றாா்.
படவரி ற்ஸ்ப்12ட்ன்ம்ஹய் திருநெல்வேலியில் வெள்ளிக்கிழமை விசாரணை நடத்திய மாநில மனித உரிமைகள் ஆணைய உறுப்பினா் கண்ணதாசன்.
