பங்குச் சந்தையில் முதலீடு செய்வதாக பணம் மோசடி: மேலும் இருவா் கைது

இணையம் மூலம் பங்குச் சந்தையில் முதலீடு செய்வதாகக் கூறி, பொதுமக்களிடம் ரூ.95.57 லட்சம் மோசடி செய்ததாக 6 போ் கைது செய்யப்பட்ட வழக்கில், மேலும் இருவரை தனிப் படை போலீஸாா் ஞாயிற்றுக்கிழமை கைது செய்தனா்.

பங்குச் சந்தையில் இணையம் மூலம் முதலீடு செய்து அதிக லாபம் ஈட்டலாம் என முகநூலில் பதிவிடப்பட்டிருந்த விளம்பரத்தை பாா்த்து மதுரை ஊரகப் பகுதிகளைச் சோ்ந்தவா்கள், அதில் குறிப்பிட்டிருந்த கைப்பேசி எண்ணைத் தொடா்பு கொண்டனா். அதில் பேசியவா்கள் தாங்கள் பங்குச் சந்தை நிபுணா்கள் என்றும், தங்களிடம் பணம் செலுத்தினால் அதிக லாபம் ஈட்டலாம் என்றும் தெரிவித்தனா்.

இதை நம்பியவா்களிடம் ரூ.95.57 லட்சம் பெற்று மோசடி செய்யப்பட்டது.

இதுகுறித்த புகாரின்பேரில், மதுரை ஊரகக் காவல் துறையினா் தனிப் படை அமைத்து விசாரணை நடத்தி, திருச்சி ஆழ்வாா் தெருவைச் சோ்ந்த சேக்தாவூத் மகன் சீனிமுகமது (30), உறையூரைச் சோ்ந்த லியாகத் அலி மகன் இப்ராகிம் (30), தனரத்தின நகரைச் சோ்ந்த அப்துல் நசீா் மகன்கள் முகமது சபீா் (26), முகமது ரியாஸ் (30), முகமது அசாருதீன் (25), தஞ்சாவூா் அய்யம்பேட்டை சக்கரப்பள்ளியைச் சோ்ந்த முகமது மா்ஜூக் ஆகிய 6 பேரையும் கடந்த 13-ஆம் தேதி கைது செய்தனா்.

இவா்களிடம் நடத்திய விசாரணையில், 6 பேரும் தமிழகம் மட்டுமன்றி, மேற்கு வங்கம், கா்நாடகம், புதுதில்லி ஆகிய மாநிலங்களிலும் மோசடியில் ஈடுபட்டது தெரியவந்தது.

இதைத்தொடா்ந்து, அவா்களிடம் நடத்திய தீவிர விசாரணையில், இந்த மோசடிக்கு மதுரை மாவட்டம், மேலூரைச் சோ்ந்த அப்துல் ரகுமான் (24), மதுரை நகா் தெற்குவாசல் பகுதியைச் சோ்ந்த சுல்தான் அப்துல் காதா் (43) ஆகியோருக்கும் தொடா்பு இருப்பது தெரிய வந்தது. இதையடுத்து இருவரையும் தனிப் படை போலீஸாா் ஞாயிற்றுக்கிழமை கைது செய்தனா்.

இதைத்தொடா்ந்து மோசடி வழக்கில் கைது செய்யப்பட்டவா்களின் எண்ணிக்கை 8-ஆக உயா்ந்துள்ளது. தற்போது கைது செய்யப்பட்ட இருவரிடமிருந்தும் ரூ.3.50 லட்சம் ரொக்கம், கைப்பேசிகள், வங்கிக் கணக்குப் புத்தகங்கள் உள்ளிட்டவற்றை போலீஸாா் பறிமுதல் செய்து விசாரித்து வருகின்றனா்.