பயன்பாட்டில் இல்லாத கழிப்பறைகளை அகற்ற நடவடிக்கை: மேயா் ஆா்.பிரியா

பெருநகர சென்னை மாநகராட்சி பகுதியில் பயன்பாட்டில் இல்லாத பொதுக் கழிப்பறைகளை அகற்ற நடவடிக்கை எடுக்கப்பட்டுள்ளதாக மேயா் ஆா்.பிரியா தெரிவித்தாா்.

பெருங்குடி மற்றும் சோழிங்கநல்லூா் மண்டலத்துக்குள்பட்ட பகுதிகளில் மாநகராட்சி சாா்பில் நடைபெற்று வரும் வளா்ச்சி திட்டப் பணிகளை மேயா் ஆா்.பிரியா சனிக்கிழமை நேரில் பாா்வையிட்டு ஆய்வு செய்தாா்.

அப்போது, பெருங்குடியில் கட்டப்பட்டு வரும் நாய்கள் கருத்தடை மையம் மற்றும் கால்நடைக் கொட்டகை கட்டுமானப் பணிகளை விரைந்து முடிக்குமாறு அலுவலா்களுக்கு அறிவுறுத்தினாா்.

தொடா்ந்து சோழிங்கநல்லூரில் ரூ. 50 லட்சத்தில் பல்நோக்குக் கட்டடம் கட்டும் பணியை அடிக்கல் நாட்டி தொடங்கி வைத்தாா். சுனாமி நகா் பகுதியில் ரூ. 40 லட்சத்தில் கட்டப்பட்ட பெண்கள் நவீன உடற்பயிற்சிக் கூடத்தை பொதுமக்கள் பயன்பாட்டுக்கு திறந்து வைத்தாா்.

பின்னா், செய்தியாளா்களிடம் மேயா் ஆா்.பிரியா கூறியதாவது:

பொது இடங்களில் மாடுகள் சுற்றித்திரிவதைத் தவிா்க்கும் வகையில் மண்டலத்துக்கு ஒரு மாடு கொட்டகை அமைக்கும் பணி நடைபெற்று வருகிறது. இதில், 200 முதல் 500 மாடுகள் பராமரிக்க திட்டமிடப்பட்டுள்ளது. மேயா் மேம்பாட்டு நிதியின் கீழ் பெண்களுக்கு என பிரத்யேக உடற்பயிற்சி கூடம் கட்டப்பட்டுள்ளது. இதுபோன்று வாா்டு வாரியாக உடற்பயிற்சிக் கூடம் அமைக்கப்பட்டுள்ளது.

கோடைக்காலத்தை முன்னிட்டு மாநகராட்சி சாா்பில் பல்வேறு நடவடிக்கை எடுக்கப்பட்டு வருகிறது. முக்கிய சாலைகளில் உள்ள சிக்னல்களில் நிழல்தாங்கல் அமைக்கப்பட்டுள்ளது.

அதுபோன்று சாலையோரங்களில் குடிநீா் வைக்க திட்டமிடப்பட்டுள்ளது. சாலையோரம் உள்ள கழிப்பறைகள் மக்களின் பயன்படுத்தாத நிலையில் அவை அகற்றப்பட்டு வருகின்றன. அந்த இடம் வேறு பயன்பாட்டுக்கு பயன்படுத்த திட்டமிடப்பட்டுள்ளது. தூய்மைப் பணியாளா்கள் பயன்படுத்தும் வாகனங்கள் பழுதடையும்போது உடனுக்குடன் சரிசெய்ய அறிவுறுத்தப்பட்டுள்ளது என்றாா் அவா்.

ஆய்வின்போது, மாநகராட்சி ஆணையா் ஜெ.குமரகுருபரன், மண்டலக் குழுத் தலைவா்கள் எஸ்.வி.ரவிச்சந்திரன், வி.இ.மதியழகன், துணை ஆணையா்கள், மாமன்ற உறுப்பினா்கள், மாநகராட்சி அலுவலா்கள் உடனிருந்தனா்.