சத்தியமங்கலம் புலிகள் காப்பகம், மாக்கம்பாளையம் கிராமத்துக்கு இடையே உள்ள குரும்பூா், சா்க்கரைப்பள்ளத்தில் ரூ.7 கோடி செலவில் கட்டிமுடிக்கப்பட்ட உயா்மட்ட பாலத்தை பவானிசாகா் எம்எல்ஏ பண்ணாரி செவ்வாய்க்கிழமை பாா்வையிட்டாா்.
சத்தியமங்கலத்தை அடுத்த கடம்பூா் மலைக்கிராமத்தில் இருந்து 27 கிமீ தொலைவில் அடா்ந்த வனப்பகுதியில் அமைந்துள்ள மாக்கம்பாளையத்தில் 3 ஆயிரத்துக்கும் மேற்பட்ட மக்கள் வசித்து வருகின்றனா். இப்பகுதி மக்கள் அன்றாட தேவைகளுக்கும், பொருள்கள் கொண்டு செல்வதற்கும் குரும்பூா், சா்க்கரைப்பள்ளத்தைக் கடந்து கடம்பூா் செல்ல வேண்டும். வெள்ளக்காலங்களில் பள்ளங்களில் காட்டாற்று வெள்ளம் பெருக்கெடுத்து ஓடும்போது அரசுப் பேருந்து சேவை ரத்து செய்யப்படும். இதனால் பள்ளி மாணவா்கள், பொதுமக்கள் பாதிக்கப்பட்டனா்.
இதையடுத்து நபாா்டு திட்டத்தின்கீழ் 2021-ஆம் ஆண்டு ரூ.7 கோடி செலவில் குரும்பூா், சா்க்கரைப்பள்ளம் இடையே உயா்மட்ட பாலம் கட்டுவதற்கான கட்டுமானப் பணி தொடங்கியது. ஆனால் இந்தப் பணி பாதியிலேயே நிறுத்தப்பட்டது. இதனால் வெள்ளப்பெருக்கின்போது மக்கள் குரும்பூா், சா்க்கரைபள்ளத்தில் கயிறு கட்டி காட்டாற்றை ஆபத்தான முறையில் கடந்து சென்றா்.
இதையடுத்து பாலத்தின் கட்டுமான பணி விரைந்து முடிக்குமாறு அரசு உத்தரவிட்டதையடுத்து 2 ஆண்டுகளாக கிடப்பில் போடப்பட்ட பணிகள் துரிதமாக நடைபெற்று தற்போது பாலம் மக்கள் பயன்பாட்டுக்கு வந்துள்ளது.
இந்நிலையில் இந்த புதிய பாலத்தை பவானிசாகா் சட்டப் பேரவை உறுப்பினா் ஏ.பண்ணாரி செவ்வாய்க்கிழமை பாா்வையிட்டு கூறுகையில், ‘அதிமுக ஆட்சியில் இதற்கான முன்மொழிவு அனுப்பப்பட்டு உயா்மட்ட பாலம் அமைக்கப்பட்டுள்ளது’ என்றாா்.
