பள்ளிகளில் ஆட்சியா் ஆய்வு

மயிலாடுதுறை: மயிலாடுதுறை மற்றும் குத்தாலம் வட்டாரத்திற்குள்பட்ட பகுதிகளில் மாவட்ட ஆட்சியா் ஹெச்.எஸ். ஸ்ரீகாந்த் புதன்கிழமை ஆய்வு செய்தாா்.

மயிலாடுதுறை வட்டாரம் பட்டமங்கலம் கிராமத்தில் நாற்றங்கால் அமைக்கப்பட்டுள்ளதை பாா்வையிட்ட ஆட்சியா், கொய்யா, வேம்பு, மாங்கன்று, பூசணங்கன்று உள்ளிட்ட மரக்கன்றுகளை ஆய்வு செய்தாா்.

தொடா்ந்து, குத்தாலம் வட்டாரத்திற்குள்பட்ட கிளியனூா் ஊராட்சியில் ஊராட்சி ஒன்றிய நடுநிலைப் பள்ளியை பாா்வையிட்டு, மாணவா்களின் கற்றல் திறனை ஆய்வு செய்தாா். அத்துடன், மதிய உணவின் தரத்தினையும், மின்சாரம், குடிநீா், கழிவறை உள்ளிட்ட அடிப்படை வசதிகள் முறையாக பராமரிக்கப்படுகின்றதா என்பதனையும் ஆய்வு செய்தாா்.

பின்னா், குத்தாலம் வட்டம் பெருஞ்சேரி அரசு உதவிபெறும் தொடக்கப் பள்ளிக்குச் சென்ற ஆட்சியா், மாணவ- மாணவிகளின் கற்றல் திறனை ஆய்வு செய்தாா். ஆய்வின்போது, மயிலாடுதுறை வட்டார வளா்ச்சி அலுவலா் சுதாகா் உடனிருந்தாா்.