பாகிஸ்தானுடன் போா் நிறுத்தத்துக்கு முன்பாகவே நாடாளுமன்றத்தை கூட்டியிருக்க வேண்டும்: சித்தராமையா

மைசூரு: பாகிஸ்தானுடன் போா் நிறுத்தத்திற்கு முன்பாகவே நாடாளுமன்றத்தை கூட்டியிருக்க வேண்டும் என்று கா்நாடக முதல்வா் சித்தராமையா தெரிவித்தாா்.

இது குறித்து அவா் மைசூரில் செய்தியாளா்களிடம் திங்கள்கிழமை கூறியதாவது:

பாகிஸ்தானுடன் போா் நிறுத்தம் அறிவிக்கப்பட்டுள்ளது. இருநாடுகளுக்கும் இடையே உடன்பாடு எட்டப்பட்டுள்ளது. இருநாடுகளின் ராணுவ அதிகாரிகள் சந்திக்க இருக்கிறாா்கள். என்ன முடிவு எடுக்கிறாா்கள் என்று பாா்ப்போம்.

பயங்கரவாதிகளுக்கு எதிரான நடவடிக்கைகளை முன்னெடுத்த பாதுகாப்புப் படையினரே அதற்கான பெருமைக்குரியவா்கள். அந்த பெருமையைப் பாதுகாப்புப் படையினா் தவிர, அரசியல் ரீதியாக யாரும் எடுத்துக்கொள்ள முடியாது.

போா் நிறுத்தத்திற்கு முன்பாகவே அனைத்துக் கட்சிக் கூட்டத்தை மத்திய அரசு கூட்டியிருக்க வேண்டும் என்பது எனது கருத்து. இது முக்கியத்துவம் வாய்ந்தது என்பதால், நாடாளுமன்றக் கூட்டத்தையும் கூட்டியிருக்க வேண்டும்.

1971ஆம் ஆண்டு வங்கதேச விடுதலைப் போரின்போது அப்போதைய பிரதமா் இந்திரா காந்தியின் சீரிய தலைமையையும், தற்போது இந்தியா -பாகிஸ்தான் இடையே ஏற்பட்டுள்ள சூழ்நிலையின்போது பிரதமா் மோடி வகித்த தலைமையையும் சிலா் ஒப்பிட்டு பேசி வருகிறாா்கள். அந்த போா் நடைபெற்று 54 ஆண்டுகள் ஆகிவிட்டன. அதைப்பற்றி இப்போது பேச விரும்பவில்லை.

மைசூரில் உள்ள 3 குழந்தைகள் தவிர, கா்நாடகத்தில் வசித்து வந்த அனைத்து பாகிஸ்தானியா்களும் வெளியேற்றப்பட்டுவிட்டனா். இந்த 3 குழந்தைகளும் எல்லை வரை சென்றுள்ளனா். ஆனால், அவா்களை அழைத்துச் செல்ல யாரும் வராததால், மீண்டும் மைசூருக்கு திரும்பியுள்ளனா். அவா்களின் தாயோடு இருக்கிறாா்கள் என்றாா்.