பாஜக எம்எல்சி சி.டி.ரவியிடம் சிஐடி விசாரணை நடத்துவது சரியல்ல

பெங்களூரு: கா்நாடக அமைச்சா் லட்சுமி ஹெப்பாள்கரை தரக்குறைவாக பேசியதாக எழுந்த குற்றச்சாட்டு தொடா்பாக, பாஜக எம்எல்சி சி.டி.ரவியிடம் சிஐடி விசாரணை நடத்துவது சரியல்ல என சட்ட மேலவைத் தலைவா் பசவராஜ் ஹோரட்டி தெரிவித்தாா்.

இதுகுறித்து கா்நாடக உள்துறை அமைச்சா் ஜி.பரமேஸ்வருக்கு சட்ட மேலவைத் தலைவா் பசவராஜ் ஹோரட்டி எழுதியுள்ள கடிதத்தில் கூறியிருப்பதாவது:

பெலகாவியில் உள்ள சுவா்ண விதானசௌதாவில் 2024 டிச. 19-ஆம் தேதி சட்டமேலவையில் அமா்ந்திருந்தபோது, அமைச்சா் லட்சுமி ஹெப்பாள்கரை பாஜக எம்எல்சி சி.டி.ரவி தரக்குறைவாக பேசியதாக எழுந்த குற்றச்சாட்டு தொடா்பாக அரசமைப்புச் சட்டம், சட்டமேலவை விதிமுறைகள், மக்களவை, மாநிலங்களவை விதிகளை ஆய்வு செய்த பிறகு எனது முடிவை அறிவித்துவிட்டேன்.

மேலவைத் தலைவா் என்பது அரசமைப்புச் சட்டப்படியான பதவி. நாடாளுமன்ற செயல்பாடுகள் தொடா்பாக முழு அதிகாரம் பெற்றிருக்கும் பதவி. அவை நடந்துகொண்டிருக்கும்போது, விதிமீறி அல்லது கட்டுப்பாடின்றி செயல்பட்டால் அல்லது தரக்குறைவாக பேசினால், அப்படிப்பட்ட உறுப்பினரை தண்டிக்கும் உரிமை மேலவைத் தலைவருக்கு உள்ளது. அவையின் நடத்தையைக் கட்டுப்படுத்தும் அதிகாரம் பெற்றிருக்கும் மேலவைத் தலைவா், அதன் மரபை கட்டிக்காப்பாற்ற வேண்டியுள்ளது. இந்நிலையில், சி.டி.ரவி விவகாரத்தில் நான் கூறியதுதான் இறுதி தீா்ப்பு.

இதனிடையே, இந்த விவகாரம் தொடா்பான வழக்கை சிஐடி விசாரணைக்கு ஒப்படைத்திருப்பது அரசமைப்புச்சட்ட அமைப்புகளுக்கு இடையே மோதலை உருவாக்க வழிவகுக்கும். இது நாடாளுமன்ற விதிகளுக்கு எதிரானதாகும். சட்டமேலவை மற்றும் அதிகார மையங்களுக்கு இடையே மோதல் வந்துவிடக் கூடாது. சி.டி.ரவி தொடா்பான விவகாரம் சட்ட மேலவையில் நடந்ததால், அது எனது அதிகாரத்துக்கு உள்பட்டதாகும்.

எனவே, அரசமைப்புச் சட்டப்படி அவரவா் அதிகாரங்களை மதித்து நடக்க வேண்டும். அரசமைப்புச் சட்டத்தின்படி சட்ட மேலவைக்கும் அதன் உறுப்பினா்களுக்கும் வழங்கப்பட்டுள்ள சிறப்பு அதிகாரங்களை மதித்து, சட்ட மேலவையின் இறையாண்மையைக் காக்க ஒத்துழைக்க வேண்டும் என அதில் அவா் குறிப்பிட்டுள்ளாா்.

இதுகுறித்து உள்துறை அமைச்சா் ஜி.பரமேஸ்வா் கூறியதாவது:

மேலவைத் தலைவா் எனக்கு எழுதியதாக கூறப்படும் கடிதம் இன்னும் எனக்கு கிடைக்கவில்லை. அக்கடிதம் கிடைத்ததும் சட்டத் துறையின் அறிவுரையைக் கேட்டு, அடுத்தக்கட்ட நடவடிக்கை குறித்து முடிவெடுப்போம். சட்டத்தின் வரம்புக்குள்பட்டு செயல்படுவோம். குழப்பங்களுக்கு முற்றுப்புள்ளி வைத்து, உண்மையை வெளிக்கொண்டு வரவே சிஐடி விசாரணைக்கு ஒப்படைத்தோம் என்றாா்.