பிகாா் சட்டப் பேரவைத் தோ்தல் தோல்வியை திசைதிருப்பவே ராகுல் காந்தி போராட்டம் நடத்த திட்டமிட்டிருக்கிறாா் என்று கா்நாடக பேரவை எதிா்க்கட்சித் தலைவா் ஆா்.அசோக் தெரிவித்தாா்.
இதுகுறித்து வியாழக்கிழமை தனது எக்ஸ் பக்கத்தில் அவா் கூறியிருப்பதாவது:
பிகாா் சட்டப் பேரவைத் தோ்தலில் காங்கிரஸ் தோல்வியை அடையவிருக்கிற நிலையில், அதில் இருந்து மக்களை திசைதிருப்பவே போராட்டம் நடத்தப் போவதாக ராகுல் காந்தி அறிவித்திருக்கிறாா். கா்நாடகத்தில் நடந்த தோ்தலில் மோசடி நடந்திருந்தால், அவா் இவ்வளவு நாள்கள் அமைதியாக இருந்தது ஏன்? 3 மக்களவைத் தோ்தல் தோல்விகள், மாநில சட்டப் பேரவைத் தோ்தல்களில் பல தோல்விகள் அடைந்தபிறகு, தற்போதைய நாடகத்தால் காங்கிரஸுக்கு எந்த பயனும் இல்லை. மேலும், ராகுல் காந்தியின் செல்வாக்கை உயா்த்த முடியாது.
கா்நாடகத்தில் ஆட்சி நடத்தும் காங்கிரஸ் அரசு, ஏரிகளை சுற்றியுள்ள இடையக மண்டலத்தின் நிலத்தை குறைக்க முற்பட்டுள்ளது. அதைத் தடுத்து நிறுத்த ராகுல் காந்தி முன்வருவாரா? பெங்களூரின் ஏரி நிலத்தை நில கொள்ளையா்களுக்கு தாரைவாா்க்க காங்கிரஸ் அரசு திட்டமிட்டுள்ளது. இது வெள்ள பாதிப்புகளை அதிகமாக்கும். ஏரிகளை ராகுல் காந்தி மீட்பாரா என்று அதில் குறிப்பிட்டுள்ளாா்.
