புகையிலைப் பொருள்கள் பறிமுதல்: இருவா் கைது

தூத்துக்குடியில் வாகனத்தில் கடத்திவரப்பட்ட புகையிலைப் பொருள்களை தனிப்படை போலீஸாா் பறிமுதல் செய்து, இருவரைக் கைதுசெய்தனா்.

தூத்துக்குடியையடுத்த வாகைகுளம் சந்திப்புப் பகுதியில் தனிப்படை காவல் உதவி ஆய்வாளா் ரவிக்குமாா் தலைமையிலான போலீஸாா் செவ்வாய்க்கிழமை வாகன சோதனையில் ஈடுபட்டனா். அவ்வழியே சென்ற ஆம்னி வேனை மடக்கிப் பிடித்து சோதனையிட்டபோது, அதில், 7 ஆயிரம் சிறிய பாக்கெட்டு புகையிலைப் பொருள்களைக் கடத்திச் செல்வது தெரியவந்தது.

காரிலிருந்த சிவகளை பண்டாரசாமி மகன் பரமசிவன் (30), ராமச்சந்திரன் மகன் பழனி (28) ஆகிய இருவரைக் போலீஸாா் கைது செய்து, புகையிலைப் பொருள்கள், ஆம்னி வேன், ரூ. 3,400 ஆகியவற்றைப் பறிமுதல் செய்தனா். இதுகுறித்து புதுக்கோட்டை போலீஸாா் வழக்குப் பதிந்து விசாரித்து வருகின்றனா்.