விழுப்புரம் மாவட்டத்தில் ஃபென்ஜால் புயலால் சேதமடைந்த பகுதிகளில் நிரந்தர மறு சீரமைப்புப் பணிகளை மேற்கொள்ள நிதி மதிப்பீட்டு அறிக்கையை சம்பந்தப்பட்ட துறை அலுவலா்கள் விரைந்து வழங்க வேண்டும் என்று ஆட்சியா் சி.பழனி அறிவுறுத்தினாா்.
விழுப்புரம் மாவட்ட ஆட்சியரகக் கூட்டரங்கில் புதன்கிழமை நடைபெற்ற அனைத்துத் துறை அலுவலா்களுடனான ஆய்வுக் கூட்டத்துக்கு தலைமை வகித்து அவா் பேசியது:
விழுப்புரம் மாவட்டத்தில் ஃபென்ஜால் புயலால் ஏற்பட்ட வெள்ள பாதிப்பால் பல்வேறு பகுதிகளில் நெடுஞ்சாலைகள், மின் கம்பங்கள், மின் மாற்றிகள், குடியிருப்புகள், பள்ளிக் கட்டடங்கள், அரசுக் கட்டடங்கள், மீன் பிடி படகுகள், வாய்க்கால்கள், ஏரிகள், குளங்கள், தடுப்பணைகள் உள்ளிட்டவை பெருமளவில் சேதமடைந்தன.
இதைத் தொடா்ந்து, பாதிப்புக்குள்ளான பகுதிகளில் மாவட்ட நிா்வாகத்தின் சாா்பில், தற்காலிக சீரமைப்புப் பணிகள் மேற்கொள்ளப்பட்டன. இந்தப் பகுதிகளில் நிரந்தரமாக சீரமைப்புப் பணிகளை மேற்கொள்ள வேண்டும். இதற்கான நிதி மதிப்பீட்டு அறிக்கையை சம்பந்தப்பட்ட துறை அலுவலா்கள் தயாா் செய்து விரைந்து வழங்க வேண்டும் என்று அலுவலா்களுக்கு உத்தரவிடப்பட்டுள்ளது என்றாா்.
கூட்டத்தில் தேசிய நெடுஞ்சாலைகள், ஊரக வளா்ச்சி, சுகாதாரம், பொதுப் பணி, வேளாண் பொறியியல், பள்ளிக் கல்வி, நீா் வளம், மீன் வளம் ஆகிய துறைகளைச் சோ்ந்த அலுவலா்கள், ஃபென்ஜால் புயலால் பாதிக்கப்பட்டுள்ள பகுதிகளில் தங்கள் துறை சாா்ந்து மேற்கொள்ளப்பட்ட தற்காலிக சீரமைப்புப் பணிகள், நிரந்தர சீரமைப்புப் பணிகளை மேற்கொள்ள எடுக்கப்பட்ட நடவடிக்கைகள் குறித்து விவரித்தனா்.
இந்தக் கூட்டத்தில் மாவட்ட ஆட்சியரின் நோ்முக உதவியாளா் (பொது) யோகஜோதி உள்ளிட்ட பல்துறை அலுவலா்கள் பங்கேற்றனா்.
