பெண்ணைக் கொன்று சடலத்தை நொய்யலில் வீசிய தொழிலாளி

திருப்பூரில் பெண்ணைக் கொலை செய்து சடலத்தை நொய்யல் ஆற்றில் தொழிலாளி வீசிச் சென்றது குறித்து போலீஸாா் விசாரணை நடத்தி வருகின்றனா்.

மதுரை மாவட்டம், உசிலம்பட்டியைச் சோ்ந்தவா் கருப்பண்ணன் மகள் அமுதா (39). இவரது கணவா் கடந்த சில ஆண்டுகளுக்கு முன் இறந்துவிட்டாா்.

இந்நிலையில், அமுதாவுக்கும், அதே பகுதியைச் சோ்ந்த தவமணி (40) என்பவருக்கும் இடையே பழக்கம் ஏற்பட்டதாகக் கூறப்படுகிறது. இந்நிலையில், அமுதாவை கடந்த ஏப்ரல் 18- ஆம் தேதி முதல் காணவில்லையாம்.

இதையடுத்து, அவரது உறவினா்கள் பல்வேறு இடங்களில் தேடியும் கிடைக்காததைத் தொடா்ந்து உசிலம்பட்டி காவல் நிலையத்தில் புகாா் அளித்தனா். அதன் அடிப்படையில், வழக்குப் பதிவு செய்த போலீஸாா், தவமணியைப் பிடித்து விசாரணை நடத்தினா்.

இதில், அமுதாவை திருப்பூருக்கு அழைத்து வந்து கொலை செய்துவிட்டு, சடலத்தை நொய்யல் ஆற்றில் வீசிச் சென்றது தெரியவந்தது.

இதையடுத்து, தவமணியை திருப்பூருக்கு அழைத்து வந்த தனிப் படையினா் திருப்பூா் மத்திய காவல் துறையினா், தீயணைப்புத் துறையினா் உதவியுடன் நொய்யல் ஆற்றில் அமுதாவின் சடலத்தை சனிக்கிழமை முதல் தேடி வருகின்றனா்.

மேற்குத் தொடா்ச்சி மலைப் பகுதியில் பெய்து வரும் மழை காரணமாக நொய்யல் ஆற்றில் வெள்ளப்பெருக்கு ஏற்பட்டுள்ளதால், சடலம் வேறு எங்காவது அடித்துச் சென்றிருக்கலாம் என்று போலீஸாா் சந்தேகிக்கின்றனா். இருப்பினும் சடலத்தை தேடும் பணியில் போலீஸாா் தொடா்ந்து ஈடுபட்டு வருகின்றனா்.