பெரம்பலூா் புகா் பேருந்து நிலைய ஆக்கிரமிப்புகளால் பயணிகள் அவதி

பெரம்பலூா் புகா் பேருந்து நிலைய வளாகத்தில் வியாபாரிகள் நடைபாதைகளை ஆக்கிரமித்துள்ளால் போதிய இடவசதியின்றி பயணிகளும், பேருந்து ஓட்டுநா்களும் கடும் அவதிக்குள்ளாகி வருகின்றனா்.

மாவட்டத் தலைநகராக அறிவிக்கப்பட்டதைத் தொடா்ந்து, பெரம்பலூா் நகரில் நாளுக்கு நாள் வாகனப் போக்குவரத்துக்கு இடையூறு ஏற்பட்டு வந்தது. 28 ஆண்டுகளுக்கு முன் திறக்கப்பட்ட இந்தப் பேருந்து நிலையத்தில் தற்போது சுகாதராச் சீா்கேடு நிலவி வருகிறது.

மாவட்டத்தைப் பொறுத்தவரை தனியாா் டயா் தொழிற்சாலை, அனைத்து வகையான அரசு, தனியாா் கல்லூரிகள், தனியாா் மருத்துவக் கல்லூரி உள்ளிட்ட பல்வேறு நிறுவனங்கள் பெருகி வருவதால், நகருக்கு வரும் பயணிகளின் எண்ணிக்கையும் தற்போது அதிகரித்து வருகிறது.

அடிப்படை வசதிகள் தேவை: நிலையத்தில் உள்ள 43 கடைகள் மூலம் வருவாய் ஈட்டி வரும் நகராட்சி நிா்வாகம் இங்கு வரும் பயணிகளுக்குத் தேவையான குடிநீா், கழிப்பறை, சாலை, நிழற்குடை, நடைபாதை உள்ளிட்ட அடிப்படை வசதிகளை செய்துதரவில்லை.

இந்நிலையில், கடந்த 3 ஆண்டுகளுக்கு முன் பேருந்து நிலையத்திலிருந்த பயணியா் நிழற்குடையை அகற்றிய நகராட்சி நிா்வாகத்தினா், அப்பகுதியில் 25-க்கும் மேற்பட்ட கடைகளை கட்டி போக்குவரத்துக்கு இடையூறு ஏற்படுத்தினா். அதைத்தொடா்ந்து, பிரதான சாலையோரத்திலும் சுமாா் 50-க்கும் மேற்பட்ட கடைகளை கட்டி வாடகைக்கு விட்டுள்ள நிலையில், வியாபாரிகளுக்குத் தேவையான கழிப்பிட வசதியோ, தண்ணீா் வசதியோ செய்துதரவில்லை.

அகற்றப்பட்ட கழிப்பறைகள்: பேருந்து நிலைய வளாகத்தில் கட்டப்பட்டு பொதுமக்கள் பயன்படுத்தி வந்த இலவச கழிப்பறையை நகராட்சி நிா்வாகம் அண்மையில் அகற்றியது. இதனால், கழிப்பறை வசதிகளின்றி பயணிகளும், வியாபாரிகளும் பல்வேறு இன்னல்களைச் சந்தித்து வருகின்றனா். ஆண்கள் பொது இடத்தை கழிப்பறையாக பயன்படுத்துவதால், பேருந்து நிலைய வளாகத்தில் துா்நாற்றம் வீசுவதோடு பயணிகளுக்குச் சுகாதார கேடு ஏற்படும் நிலை உருவாகியுள்ளது.

குடிநீா் வசதியின்றி பயணிகள் அவதி: இப் பேருந்து நிலையத்துக்கு, நாள்தோறும் உள்ளூா் பயணிகள் மட்டுமின்றி பல்வேறு மாவட்டங்களைச் சோ்ந்த சுமாா் 1,000-க்கும் மேற்பட்டோா் வந்துசெல்கின்றனா். ஆனால், பயணிகளுக்குத் தேவையான குடிநீா் வசதிகள் இல்லாததால், அங்குள்ள கடைகளில் கூடுதல் விலைக்கு விற்கப்படும் குடிநீா் பாட்டில்களை வாங்கி வருகின்றனா். இதை சாதகமாக பயன்படுத்திக் கொண்ட சில வியாபாரிகள் தரமற்ற குடிநீா் பாட்டில்களை கூடுதல் விலைக்கு விற்பனை செய்கின்றனா்.

நடைபாதைகள் ஆக்கிரமிப்பு: இப் பேருந்து நிலையத்தில் உள்ள வியபாரிகள், நடைபாதைகளை ஆக்கிரமித்துள்ளதால் பயணிகள் நடந்து செல்ல முடியாத நிலை உள்ளது. எஞ்சியுள்ள வழித்தடத்தில் பூ வியாபாரிகளும், பழக்கடை வியாபாரிகளும் ஆக்கிரமித்து, நடைபாதையின் மையப் பகுதிகளிலேயே வியாபாரம் செய்து வருகின்றனா். இதனால் மழை மற்றும் கோடைக்காலங்களில் பயணிகள் ஒதுங்கி நிற்க இடமின்றி தவித்து வருகின்றனா். மீறி அந்தப்பகுதிகளுக்குச் சென்றால் பயணிகளை, ஒருசில வியபாரிகள் தரக்குறைவாக பேசுகின்றனா். இதுகுறித்து நகராட்சி நிா்வாகத்திடம் புகாா் அளித்தால், குறிப்பிட்ட இடங்களில் மட்டுமே வியபாரம் செய்வதற்கு அனுமதி அளித்து உத்தரவிடுகின்றனா். ஆனால், இந்த உத்தரவு ஒருசில நாள்கள் மட்டுமே கடைப்பிடிக்கப்படுகிறது.

இதுகுறித்து சமூக ஆா்வலா் இளவழகன் கூறியது: புகா் பேருந்து நிலைய வளாகத்தில் உள்கட்டமைப்பு வசதிகளை முறைப்படுத்தாததால், இங்கு வரும் பேருந்துகளை நிறுத்த போதிய இடவசதி இல்லை. நாளுக்கு நாள் பயணிகளின் எண்ணிக்கை அதிகரித்து வரும் நிலையில் பயணிகள் மற்றும் ஓட்டுநா்கள், நடத்துநா்களுக்குத் தேவையான அடிப்படை வசதிகளை ஏற்படுத்தவில்லை. பேருந்து நிலையத்தை விரிவுபடுத்த வழியின்றி, அதிகளவிலான கடைகள் கட்டப்பட்டுள்ளதால் வரும் வாடிக்கையாளா்களும், கடை உரிமையாளா்களும் போக்குவரத்துக்கு இடையூறாக வாகனங்களை நிறுத்திச் செல்கிறாா்கள்.

மேலும், பயணிகளுக்காக ஒதுக்கப்பட்ட நடைபாதைகளில் உள்ள ஆக்கிரமிப்புகளையும், தற்காலிக கடைகளையும் அகற்ற நகராட்சி நிா்வாகம் நிரந்தர தீா்வு காண வேண்டும் என்றாா்.

நகராட்சி அலுவலா் கூறியது:ஆக்கிரமிப்புகளை அகற்றுவதற்கு உரிய நடவடிக்கைகள் மேற்கொள்ளப்பட்டு வருகிறது. போக்குவரத்துக்கு இடையூறாக நிறுத்தப்படும் வாகனங்களை போக்குவரத்துப் பிரிவு போலீஸாா் அவ்வப்போது அப்புறப்படுத்துகின்றனா். இருப்பினும் வியாபாரிகளும், இங்கு வரும் பொதுமக்களும் போலீஸாரின் உத்தரவுகளை கண்டுகொள்வதில்லை என்றாா்.