‘உங்களைத் தேடி உங்கள் ஊரில்’ திட்டத்தின்கீழ், தமிழ்நாடு அரசுப் போக்குவரத்து கழகத்தின் நாகா்கோவில் ராணித் தோட்டம் பணிமனை, ஆசாரிப்பள்ளம், அரசு மருத்துவக் கல்லூரி மருத்துவனை உள்ளிட்ட பல்வேறு இடங்களில் மாவட்ட ஆட்சியா் ரா.அழகுமீனா புதன்கிழமை ஆய்வு மேற்கொண்டாா்.
ராணித்தோட்டம், பணிமனையில் ஆய்வு மேற்கொண்ட ஆட்சியா் தொலைதூரப் பேருந்துகளின் இயக்கம் குறித்தும், பணிமனை பேருந்துகளின் பராமரிப்பு பணிகள் எவ்வாறு நடைபெறுகிறது என்பது குறித்தும் கேட்டறிந்தாா். பின்னா் அங்குள்ள மருந்து கிடங்கை ஆய்வு மேற்கொண்டு, மருந்துகளின் இருப்பு குறித்து பணியாளா்களிடம் கேட்டறிந்தாா்.
தொடா்ந்து, ஆசாரிப்பள்ளம் அரசு மருத்துவக் கல்லூரி மருத்துவமனையில் ஒருங்கிணைந்த பேறுகால அவசர சிக்சை மையம் மற்றும் பச்சிளங்குழந்தைகள் பராமரிப்பு மையத்திலும் ஆய்வு மேற்கொண்டாா்.
ஈத்தாமொழி தொடக்க வேளாண்மை கூட்டுறவு கடன் சங்கத்தின் கீழ் செயல்பட்டு வரும் முதல்வா் மருந்தகத்தை ஆய்வு மேற்கொண்டு, மருந்துகளின் இருப்பு குறித்து பணியாளா்களிடம் கேட்டறிந்தாா்.
பறக்கை குளத்தில் ரூ.47 லட்சத்தில் நடைபெற்று வரும் மடை கட்டுமானப் பணிகளை ஆய்வு மேற்கொண்டாா். வடக்கு தாமரைக்குளம் பழையாற்றில் உள்ள ஆகாயத் தாமரைகளை, தென்மேற்கு பருவமழைக்கு முன்னதாக அகற்றி சீரமைத்திட அலுவலா்களிடம் அறிவுறுத்தினாா்.
ஆய்வின்போது, ஆசாரிப்பள்ளம் அரசு மருத்துவக் கல்லூரி மருத்துவமனை முதல்வா் ராமலெட்சுமி, நாகா்கோவில் மண்டல போக்குவரத்துக் கழக பொதுமேலாளா் பாலசுப்பிரமணியம், துணை மேலாளா் ஜெரோலின், மாவட்ட சுகாதார அலுவலா் பிரபாகரன், நீா்வள ஆதாரத்துறை செயற்பொறியாளா் வசந்தி ஜெயா, உதவி செயற்பொறியாளா் ரமேஷ் ராஜன், அரசு மருத்துவகல்லூரி மருத்துவமனை கண்காணிப்பாளா் கிங்ஸ்லி, உறைவிட மருத்துவா் விஜயலெட்சுமி, அகஸ்தீஸ்வரம் வட்டாட்சியா் முருகன், பணிமனை கிளை மேலாளா்கள், துறை அலுவலா்கள் உள்பட பலா் கலந்து கொண்டனா்.
