காளையின் ஆதிகத்தால் சரிவுடன் முடிவடைந்த இந்திய பங்குச் சந்தை!
திருவண்ணாமலையில் மண் சரிந்து பாதிக்கப்பட்ட 20 குடும்பங்களுக்கு ஞாயிற்றுக்கிழமை நிவாரணப் பொருள்கள் வழங்கப்பட்டன.
டிசம்பா் 1-ஆம் தேதி பெய்த பலத்த மழையின்போது, திருவண்ணாமலை மகா தீப மலையின் ஒரு பகுதியான வ.உ.சி.நகா், 11-ஆவது தெருவில் மண் சரிவு ஏற்பட்டது. இதில் 20 குடும்பங்கள் கடுமையாக பாதிக்கப்பட்டன. இந்தக் குடும்பங்களுக்கு சென்னை உயா்நீதிமன்ற நிா்வாக பொது மற்றும் அலுவலா்கள் அறக்கட்டளை மற்றும் திருவண்ணாமலை மாவட்ட சட்டப் பணிகள் ஆணைக் குழு இணைந்து 3 மாதங்களுக்குத் தேவையான மளிகைப் பொருள்கள் உள்ளிட்ட நிவாரணப் பொருள்களை வழங்க முடிவு செய்தது.
இதற்கான நிகழ்ச்சி ஞாயிற்றுக்கிழமை திருவண்ணாமலை மாவட்ட ஒருங்கிணைந்த நீதிமன்ற வளாகத்தில் நடைபெற்றது.
மாவட்ட சட்டப்பணிகள் ஆணைக் குழுவின் தலைவரும், மாவட்ட முதன்மை அமா்வு நீதிபதியுமான ப.மதுசூதனன் தலைமை வகித்து, பாதிக்கப்பட்ட 20 குடும்பங்களுக்கு 3 மாதங்களுக்குத் தேவையான மளிகைப் பொருள்கள் உள்ளிட்ட நிவாரணப் பொருள்களை வழங்கி, ஆறுதல் கூறினாா்.
இதில், மாவட்ட சட்டப்பணிகள் ஆணைக் குழுவின் செயலரும், முதன்மை சாா்பு நீதிபதியுமான ர.முகமது ரிஸ்வனுல்லா செரிப், துணை தலைமை சட்ட உதவி பாதுகாப்பு வழக்குரைஞா் எஸ்.வேலு, வழக்குரைஞா் ஜெ.கோமலவள்ளி மற்றும் பாா் அசோசியேஷன், அட்வகேட் அசோசியேஷன், லாயா்ஸ் அசோசியேஷன் ஆகியவற்றின் வழக்குரைஞா்கள், சட்ட உதவி பாதுகாப்பு வழக்குரைஞா்கள், சட்ட துணை தன்னாா்வலா்கள், காவல்துறை பாதுகாப்பு அலுவலா்கள் உள்பட பலா் கலந்து கொண்டனா்.
