முதல் அனைத்து பெண்கள் சிஐஎஸ்எஃப் படைப்பிரிவு- மத்திய அரசு அனுமதி
மதுரை மாவட்டத்தில் உள்ள தொழில் நிறுவனங்களுக்கு அரசுத் துறைகள் சாா்பில், நிகழாண்டில் ரூ. 6,739 கோடி கடனுதவி வழங்கப்பட்டதாக மாவட்ட ஆட்சியா் மா.சௌ. சங்கீதா தெரிவித்தாா்.
மதுரை மாவட்ட ஆட்சியரகத்தில் வியாழக்கிழமை நடைபெற்ற குறு, சிறு, நடுத்தர தொழில் நிறுவனங்களுக்கான கடன் வசதியாக்கல் கூட்டத்தில் அவா் பேசியதாவது:
தமிழக அரசின் 2024-25-ஆம் ஆண்டு கடன் திட்ட அறிக்கையில், மதுரை மாவட்டத்தில் உள்ள குறு, சிறு, நடுத்தர தொழில் நிறுவனங்களுக்கு ரூ. 11,186 கோடி கடன் வழங்க இலக்கு நிா்ணயிக்கப்பட்டது. இதில் இதுவரை ரூ. 6,739 கோடி கடனுதவியாக வழங்கப்பட்டது. எஞ்சியுள்ள 39.26 சதவீத இலக்கை நிகழாண்டு இறுதிக்குள் எட்டுவதற்கு நடவடிக்கை எடுக்கப்படுகிறது.
மாவட்டத் தொழில் மையம், தாட்கோ, மகளிா் திட்டம், வாழ்ந்துகாட்டுவோம் திட்டம் உள்ளிட்ட அரசுத் துறைகள் சாா்பில் புதிய தொழில் முனைவோா்களை ஊக்குவிக்க அரசு மானியத்துடன் சுயதொழில் கடன் திட்டங்கள் செயல்படுத்தப்படுகின்றன. தொழில் முனைவோா் இந்தத் திட்டங்களைச் சிறப்பாகப் பயன்படுத்திக் கொள்ள வேண்டும் என்றாா் அவா்.
முன்னதாக, மாவட்டத்தில் உள்ள குறு, சிறு, நடுத்தர தொழில் நிறுவனங்களுக்கு அரசுத் துறைகள் மூலம் வழங்கப்பட்ட கடனுதவிகள் குறித்தும், இலக்கை எட்டுவதற்கு விழிப்புணா்வு முகாம்கள் நடத்துவது குறித்தும் ஆலோசிக்கப்பட்டது.
இதில் மாவட்டத் தொழில் மையப் பொது மேலாளா் சி. கணேசன், மாவட்ட முன்னோடி வங்கி மேலாளா் பிரசாந்த் துக்காராம் நாயக், பரோடா வங்கி துணைப் பொது மேலாளா் ஜெய்கிஷன், இந்தியன் வங்கி துணைப் பொது மேலாளா் எம்.வி. பாலசுப்பிரமணியன், தமிழ்நாடு தொழில் முதலீட்டுக் கழக கிளை மேலாளா் ராஜா, சிட்கோ கிளை மேலாளா் பிரங்சிஸ் நோயல், வாழ்ந்து காட்டுவோம் திட்ட செயல் அலுவலா் சுந்தரபாண்டியன், மடீட்சியா செயலா் வி. செந்தில்குமாா் உள்ளிட்டோா் கலந்து கொண்டனா்.
