சென்னை - திருச்சி தேசிய நெடுஞ்சாலையில் போக்குவரத்து நிறுத்தம்!
விழுப்புரம் மாவட்டத்தில் மழை பாதிப்பு பகுதிகளில் மீட்புப் பணிகளை மேற்கொள்ள அனைத்துத் துறை அலுவலா்களுக்கு உத்தரவிடப்பட்டுள்ளதாக வனத்துறை அமைச்சா் க.பொன்முடி தெரிவித்தாா்.
விழுப்புரம் மாவட்ட ஆட்சியா் அலுவலகத்தில் செயல்பட்டு வரும் கட்டுப்பாட்டு அறையில் அமைச்சா் க.பொன்முடி ஞாயிற்றுக்கிழமை ஆய்வு மேற்கொண்டு, பொதுமக்களின் கோரிக்கைகளை தொலைபேசி மூலம் கேட்டறிந்தாா்.
பின்னா், செய்தியாளா்களிடம் அவா் கூறியதாவது: ஃபெஞ்ஜால் புயல் காரணமாக, விழுப்புரம் மாவட்டத்தில் அதிக பாதிப்பு ஏற்பட்டுள்ளது. தற்போது வரை 50 சதவீதத்துக்கும் மேல் மழை பெய்துள்ளது.
பலத்த மழை காரணமாக 11 இடங்களில் சுவா் இடிந்து விழுந்ததுடன், 51 இடங்களில் மின் கம்பங்கள் விழுந்துள்ளன. 23 மரங்கள் விழுந்துள்ளது. மரங்கள் அகற்றும் பணிகள் தொடா்ந்து நடைபெற்று வருகிறது. 7 கால் நடைகள் இறந்துள்ளன. 21 புயல் பாதுகாப்பு மையங்களில் 1,281 போ் தங்க வைக்கப்பட்டுள்ளனா்.
மேலும், சில முகாம்கள் அமைப்பதற்கும் நடவடிக்கை மேற்கொள்ளப்பட்டு வருகிறது. மாவட்டத்தின் பல்வேறு பகுதிகளில் குடியிருப்புப் பகுதிகளில் மழை நீா் சூழ்ந்துள்ளதாக மாவட்ட ஆட்சியரின் கட்டுப்பாட்டு அறைக்கு தகவல் வருகிறது.
செஞ்சி வட்டத்தில் 43 பகுதிகளில் தண்ணீா் சூழ்ந்துள்ளது. மழை பாதிப்பு பகுதிகளில் மீட்புப் பணிகளை மேற்கொள்ள அனைத்துத்துறை அலுவலா்களுக்கும் உத்தரவிடப்பட்டுள்ளது என்றாா்.
