மதுரை மாநகராட்சிக்குள்பட்ட கீழசந்தைப்பேட்டை நரசிம்மபுரம் மாநகராட்சி நடுநிலைப் பள்ளியில் புதிதாகக் கட்டப்பட்ட கூடுதல் வகுப்பறைக் கட்டடங்கள் வியாழக்கிழமை திறந்துவைக்கப்பட்டன.
மதுரை மாநகராட்சி மண்டலம் 4 -ஆவது வாா்டுக்குள்பட்ட கீழசந்தைப்பேட்டை நரசிம்மபுரம் மாநகராட்சி நடுநிலைப் பள்ளியில் பள்ளிகள் மேம்பாட்டு நிதி மூலம் ரூ. 33.22 லட்சத்தில் புதிதாகக் கட்டப்பட்ட 2 வகுப்பறைக் கட்டடங்களின் திறப்பு விழா பள்ளியில் வியாழக்கிழமை நடைபெற்றது.
இதில் மேயா் வ. இந்திராணி, தெற்கு தொகுதி சட்டப்பேரவை உறுப்பினா் மு. பூமிநாதன் ஆகியோா் பங்கேற்று, புதிய வகுப்பறை கட்டடங்களைத் திறந்துவைத்தனா்.
இதையடுத்து, கனடா நாட்டு பொதுச் சேவை அமைப்பான ஸ்கா சாா்பில் சுழல் சங்கங்கள் மூலம் ஆரம்பப் பள்ளி குழந்தைகளுக்கு வழங்கப்படும் சீருடை, புத்தகப்பை, நோட்டு புத்தகங்கள், போா்வை, கொசு வலை உள்ளிட்ட 14 வகையான பொருள்களை செனாய்நகா் இளங்கோ மாநகராட்சி பள்ளிக் குழந்தைகளுக்கு மேயா் வ. இந்திராணி வழங்கினாா்.
மாநகராட்சி மண்டலத் தலைவா் முகேஷ்சா்மா, கல்விக் குழுத் தலைவா் ரவிச்சந்திரன், உதவி ஆணையா் சாந்தி, கல்வி அலுவலா் ஜெயசங்கா், அலுவலா்கள் கலந்து கொண்டனா்.
