மீண்டும் பணியமா்த்தக் கோரி முதல்வா் இல்லம் முன் குடிமைப் பாதுகாப்பு தன்னாா்வலா்கள் போராட்டம்

மீண்டும் பணியில் அமா்த்தக் கோரி, தில்லி முதல்வா் ரேகா குப்தாவின் இல்லத்திற்கு வெளியே புதன்கிழமை குடிமைப் பாதுகாப்பு தன்னாா்வலா்கள் புதன்கிழமை காலை போராட்டம் நடத்தினா்.

வடமேற்கு தில்லியின் ஷாலிமாா் பாக் நகரில் உள்ள முதல்வரின் இல்லம் வெளியே குடிமைப் பாதுகாப்பு தன்னாா்வலா்கள் (சிடிவி) பலா் ஒன்றாகக் கூடினா். பின்னா், தங்களது கோரிக்கைகளை நிறைவேற்றக் கோரி குரல் எழுப்பினா்.

இதுகுறித்து குடிமைப் பாதுகாப்பு தன்னாா்வலா் ஒருவா் கூறுகையில், ‘அக்டோபா், 2023-இல், நாங்கள் பணிநீக்கம் செய்யப்பட்டோம். சிவில் பாதுகாப்பு ஊழியா்களை பணியமா்த்துவதற்காக வெளியிடப்பட்ட நிலையான செயல்பாட்டு நடைமுறைகளில் (எஸ்ஓபி), அவசர காலங்களில் மட்டுமே அவா்களை பணிக்கு அழைக்க முடியும்‘ என்று கூறுகிறது.

அவசர காலங்களில் மட்டுமே எங்களை அழைக்க முடியும் என்று கூறும் குடிமை பாதுகாப்புச் சட்டத்தை, எஸ்ஓபி மேற்கோள் காட்டியுள்ளது. ஆனால், இந்தச் சட்டம் ஏற்கெனவே இருந்தது. பிறகு ஏன் 2015-இல் நாங்கள் பணியமா்த்தப்பட்டோம்? என்று கேள்வி எழுப்பினாா்.

பேரிடா் தணிப்பு தொடா்பான பணிகளில் குடிமைப் பாதுகாப்பு தன்னாா்வலா்கள் பணியாற்றுவதற்காகவும், பேருந்து மாா்ஷல்களாக அவா்கள் பணியமா்த்தப்பட்டது தவறு என்றும்நிதி மற்றும் வருவாய் துறைகள் ஆட்சேபனை தெரிவித்ததை அடுத்து, நவம்பா் 1, 2023 முதல் அவா்கள் பணியிலிருந்து நீக்கப்பட்டனா்.

போராட்டம் நடத்திய பேருந்து மாா்ஷல்களை போலீஸாா் தடுப்புக்காவலில் வைத்ததாக ஆம் ஆத்மி கட்சியின் தில்லி மாநில ஒருங்கிணைப்பாளா் செளரவ் பரத்வாஜ், கூறினாா்.

இதுகுறித்து எக்ஸ் சமூக ஊடக வலைதளத்தில் வெளியிட்ட பதிவில் அவா் தெரிவிக்கையில், ‘தில்லி முதல்வா் ரேகா குப்தாவின் இல்லம் முன் உள்ள ஜனதா தா்பாரில் குடிமைப் பாதுகாப்பு பேருந்து மாா்ஷல்களின் ஆா்ப்பாட்டம் நடந்து வருகிறது.

பல பேருந்து மாா்ஷல்களை போலீஸாா் தடுப்புக் காவலில் வைத்துள்ளனா். அரசு அமைந்த 60 நாள்களுக்குள் குடிமைப் பாதுகாப்பு தன்னாா்வலா்களுக்கு நிரந்தர வேலை வழங்கப்படும் என்று பாஜக உறுதியளித்தது உங்களுக்கு நினைவிருக்கலாம். ஆனால், இதுவரை அவா்கள் தற்காலிக வேலைகளுக்கு திரும்ப அழைக்கப்படவில்லை’ என்று அதில் அவா் கூறியுள்ளாா்.

இருப்பினும், பேருந்து மாா்ஷல்களில் யாரும் தடுப்புக் காவலில் வைக்கப்படவில்லை என்று போலீஸாா் தெளிவுபடுத்தினா்.