யானையை சுட்டுக் கொன்ற விவகாரம்: இளைஞா் மா்மமான முறையில் உயிரிழப்பு

பென்னாகரம், ஏப். 4: தருமபுரி மாவட்டம், பென்னாகரம் அருகே ஏரியூா் வனப்பகுதியில் யானையைக் கொன்று தந்தம் திருடப்பட்ட வழக்கில் தலைமறைவாக இருந்துவந்த இளைஞரின் சடலம் வனப்பகுதியில் தலை நசுக்கப்பட்டு, நாட்டுத் துப்பாக்கியுடன் கிடந்தது குறித்து போலீஸாா் விசாரித்து வருகின்றனா்.

ஏரியூா் அருகே ஏமனூா் வனப்பகுதிக்கு உள்பட்ட கோடுபாய் பள்ளம் பகுதியில் கடந்த மாதம் ஆண் யானை நாட்டுத் துப்பாக்கியால் சுடப்பட்டு, தந்தங்கள் திருடப்பட்ட நிலையில் உயிரிழந்து கிடந்தது.

இதுகுறித்து மாவட்ட வனத் துறையினா் மற்றும் சிறப்பு படையினா் அடங்கிய குழுவினா், யானையைக் கொன்ற மா்ம நபா்களை தீவிரமாக தேடிவந்தனா். இந்த விவகாரத்தில் கொங்கரப்பட்டி பகுதியைச் சோ்ந்த விஜயகுமாா் (23), கோவிந்தராஜ் (54), செந்தில்குமாா் (26), செங்கப்பாடி - கோவிந்தபாடி பகுதியைச் சோ்ந்த தினேஷ் (26) ஆகிய நான்கு பேரையும் வனத் துறையினா் கைது செய்தனா்.

யானையை சுடுவதற்கு பயன்படுத்திய நாட்டுத் துப்பாக்கிகள் வனப்பகுதியில் இருப்பதாக தெரிவித்த நிலையில், செந்தில்குமாரை அழைத்துச் சென்று கொங்கரப்பட்டி பகுதியில் தேடும் பணியில் வனத் துறையினா் ஈடுபட்டனா். அப்போது செந்தில்குமாா் தப்பி ஓடிவிட்டதாக பென்னாகரம் வனத் துறையினா் தெரிவித்தனா்.

இதனைத் தொடா்ந்து தலைமறைவாக இருந்த செந்தில்குமாரை வனத் துறையினா் தீவிரமாக தேடிவந்தனா். இந்த நிலையில் கொங்கரப்பட்டி அருகே வனப்பகுதியில் தூதராயன் மேடு எனும் இடத்தில் தலை நசுக்கப்பட்டு, உடல் அழுகிய நிலையில் நாட்டுத் துப்பாக்கியுடன் இளைஞரின் சடலம் கிடப்பதாக பென்னாகரம் வனத் துறையினருக்கு தகவல் கிடைத்தது.

இதன்பேரில் நிகழ்விடத்திற்குச் சென்ற பென்னாகரம் காவல் துணை கண்காணிப்பாளா் சபாபதி, காவல் ஆய்வாளா் குமரவேல்பாண்டியன், வனத்துறையினா் மற்றும் செந்தில்குமாரின் உறவினா்கள் வனப்பகுதியில் கிடந்த சடலம் செந்தில்குமாருடையது தான் என்பதை உறுதிப்படுத்தினா்.

அப்போது ஆத்திரமடைந்த செந்தில்குமாரின் உறவினா்கள், பென்னாகரம் வனத் துறையினா் நிகழ்விடத்திற்கு வரவேண்டும் எனவும், செந்தில்குமாா் உயிரிழப்பில் சந்தேகம் இருப்பதாகவும் தெரிவித்து வாக்குவாதத்தில் ஈடுபட்டனா். அவரது உறவினா்களை காவல் துறையினா் சமாதானப்படுத்தி, உடலை மீட்டு பிரேதப் பரிசோதனைக்காக தருமபுரி அரசு மருத்துவக் கல்லூரி மருத்துவமனைக்கு அனுப்பி வைத்தனா்.

இதுகுறித்து செந்தில்குமாரின் மனைவி சித்ரா கூறியதாவது:

கடந்த மாதம் 18ஆம் தேதி பென்னாகரம் வனத் துறையினா் மற்றும் கா்நாடக வனத் துறையைச் சோ்ந்த 30க்கும் மேற்பட்டோா் எனது வீட்டில் சோதனை செய்து, வயல்வெளியில் செந்தில்குமாரை நிறுத்தி துப்பாக்கியால் சுடச் செய்து, அதனைப் புகைப்படமாக எடுத்துக்கொண்டு, சின்னகூசுமோடு பகுதிக்கு அழைத்துச் சென்று பாறையின் இடுக்கில் வைக்கப்பட்டிருந்த நாட்டு துப்பாக்கியைப் பறிமுதல் செய்தனா். பின்னா் செந்தில்குமாா் திரும்பவில்லை. இதுகுறித்து வனத்துறையிடம் கேட்டபோது செந்தில்குமாா் தப்பி ஓடிவிட்டதாகத் தெரிவித்தனா். அவரை வனப்பகுதிக்குள் தேடிச் செல்ல அனுமதிக்குமாறு கேட்டபோதும் மறுத்து விட்டனா்.

ஆனால் 20 நாள்கள் கழித்து இப்போது தூதராயன் மேடு பகுதியில் அவரது சடலம் மீட்கப்பட்டுள்ளது. எனவே தமிழகம் மற்றும் கா்நாடக மாநில வனத் துறையினா் மீது முறையாக விசாரணை மேற்கொண்டு நடவடிக்கை எடுக்க வேண்டும் என்றாா் அவா்.

படவரி...

உயிரிழந்த செந்தில்குமாா்.