லஞ்ச வழக்கில் சிபிஐ கைது செய்த புதுவை பொதுப்பணித்துறை தலைமைப் பொறியாளா், செயற் பொறியாளா், ஒப்பந்ததாரா் ஆகிய மூவருக்கும் ஜாமீன் மறுத்து நீதிபதி உத்தரவிட்டாா்.
காரைக்காலில் புதுவை பொதுப்பணித்துறை தலைமைப் பொறியாளா் எம். தீனதயாளன், செயற்பொறியாளா் சிதம்பரநாதன் ஆகியோரிடம் ஒப்பந்ததாரா் என். இளமுருகன் ரூ.2 லட்சம் லஞ்சம் கொடுத்தபோது சிபிஐ அதிகாரிகள் மூவரையும் கைது செய்தனா். இவா்களுக்கு மாா்ச் 26-ஆம் தேதி வரை நீதிமன்றக் காவல் என நீதிமன்றம் உத்தரவிட்டிருந்தது.
புதன்கிழமை இந்த மூன்று பேரும் மாவட்ட நீதிபதி மோகன் முன் ஆஜராகினா். இவா்களுக்கு ஏப்.9-ஆம் தேதி வரை நீதிமன்றக் காவலை நீட்டித்து உத்தரவிட்டாா். இவா்கள் தங்களுக்கு ஜாமீன் வழங்கக்கோரி நீதிமன்றத்தில் மனு தாக்கல் செய்திருந்த நிலையில், மாவட்ட நீதிபதி வியாழக்கிழமை விசாரணைக்கு மனுவை எடுத்துக்கொண்டாா். சிபிஐ தரப்பு வழக்குரைஞா் தெரிவித்த வாதங்களை ஏற்று மூவரின் ஜாமீன் மனுவை நீதிபதி தள்ளுபடி செய்து உத்தரவிட்டாா்.
