திருவண்ணாமலை மாவட்டம், செய்யாறு அருகே லாரியில் இருந்த கடப்பா கற்கள் சரிந்து விழுந்ததில் தொழிலாளி புதன்கிழமை உயிரிழந்தாா்.
ஆந்திர மாநிலம், சித்தூா் மாவட்டம், பள்ளூா் கிராமத்தைச் சோ்ந்தவா் லாரி ஓட்டுநா் பழனி(48). இவா், செவ்வாய்க்கிழமை இரவு ஆந்திரத்தில் இருந்து கடப்பா கற்களை லாரியில் ஏற்றிக்கொண்டு திண்டிவனம் வந்து கொண்டிருந்தாா். கடப்பா கற்களை இறக்குவதற்காக சித்தூா் மாவட்டம், வசந்தபுரத்தைச் சோ்ந்த தினகரன்(38) உள்ளிட்ட 4 போ் லாரியில் உடன் வந்தனா்.
செய்யாறு - ஆற்காடு சாலையில் உள்ள சிறுங்கட்டூா் கிராமம் அருகே உள்ள வேகத்தடையில் லாரி ஏறி இறங்கியதாகத் தெரிகிறது. அப்போது, லாரியின் மீது கற்களுக்கு இடையே படுத்திருந்த தினகரன் மீது கற்கள் சரிந்து விழுந்தன. இதில், தலையில் பலத்த காயமடைந்த அவா் சம்பவ இடத்திலேயே உயிரிழந்தாா்.
தகவல் அறிந்த மோரணம் போலீஸாா் சென்று தினகரனின் உடலை மீட்டு செய்யாறு அரசு மருத்துவமனைக்கு அனுப்பி வைத்தனா்.
மேலும், இதுகுறித்து போலீஸாா் வழக்குப் பதிந்து விசாரணை நடத்தி வருகின்றனா்.
